Mask "Tesla"dan gedə bilər

"Tesla" avtomobil istehsalçısının Direktorlar Şurasının sədri Robin Denholm səhmdarlara kəskin xəbərdarlıq edib. O bildirir ki, səhmdarlar baş direktor İlon Mask üçün nəzərdə tutulmuş təxminən 1 trilyon dollar dəyərində kompensasiya paketinin lehinə səs verməlidirlər. Əks halda, Mask şirkətdən ayrıla bilər. Denholm bu məsələni 6 noyabrda keçiriləcək illik yığıncaq ərəfəsində səhmdarlara göndərdiyi məktubda yazıb. Onun fikrincə, İlon Maskın olmadığı bir "Tesla" böyük dəyər itkisinə məruz qala bilər. Denholm qeyd edir ki, şirkət artıq sadəcə avtomobil istehsalçısı kimi yox, gələcəyə yönəlmiş bir texnologiya lideri kimi qiymətləndirilir. Buna görə də Maskın rəhbərliyi şirkət üçün böyük əhəmiyyət daşıyır.

Denholm Maskın şirkətin gələcəyi üçün əsas fiqur olduğunu vurğulayıb. O qeyd edir ki, "Tesla" ənənəvi avtomobil şirkəti çərçivəsindən çıxır, çünki tam avtopilot (FSD) və "Optimus" robotları kimi sahələrə daha çox diqqət yetirir. Bu dəyişikliklər Maskın liderliyini tələb edir. Lakin bu təklif səhmdarlar arasında ciddi müqavimətlə üzləşib. Dünyanın ən böyük etibarnamə konsaltinq şirkəti olan "Institutional Shareholder Services" (ISS) bu "astronomik" məbləğə görə səsvermədə təklifin əleyhinə çıxmağı tövsiyə edib.

Həmçinin bir sıra həmkarlar ittifaqları və korporativ nəzarət qrupları da paketin əleyhinə kampaniyaya başlayıb. Onlar Maskın siyasi aktivliyinin brendə zərər verdiyini əsas gətirirlər. Denholm isə iddia edir ki, məsələ kompensasiya ödənişlərindən daha çox, səsvermə üzərində təsir imkanları ilə bağlıdır. O bildirir ki, Mask süni intellektlə bağlı "pis şeylərin baş verməməsi" üçün kifayət qədər təsir gücünə malik olmaq istəyir. Mask həmçinin şirkətin inkişaf etdirdiyi "robot ordusu"na nəzarət məsələsi ilə bağlı narahatlığını dilə gətirib.

Tam kompensasiya paketi Maskın şirkətdəki payını təxminən 25%-ə qədər artırmağa imkan verəcək. Bu, Maskın son bir ildə açıq şəkildə tələb etdiyi hədəfdir. Səhmdarlar bu paketi 5 noyabra qədər təsdiqləməlidir. Bu səsvermə "Tesla"nın gələcək idarəetmə quruluşunu və Maskın liderlik rolunu müəyyən edəcək.