Mariyana Kuyundziç: Azərbaycan tarixində güclü qadınlarla bağlı böyük nümunələr var

Avropa İttifaqının (Aİ) Azərbaycandakı səfiri Mariyana Kuyundziç "Aİ və Gənclər: Dayanıqlı Gələcək Naminə" adlı tədbirdə çıxış edib. Səfir bildirib ki, diplomatiya onu Azərbaycana gətirdi, lakin bu ölkəyə olan heyranlığı illər əvvəl başlamışdı. Kuyundziç Azərbaycana ilk dəfə sentyabrın 2-də gəlsə də, bu mədəniyyət və tarix hələ çoxdan onu cəlb edirdi. Diplomat qeyd edib ki, Azərbaycan tarixində güclü qadınlarla bağlı böyük nümunələr mövcuddur. O, gənc xanımları uğurlu olmaq üçün səy göstərməyə çağırıb. Səfir bu yolda onların səylərini dəstəkləmək istədiyini də dilə gətirib.

Səfir Azərbaycana marağının necə yarandığını izah edərək, bu ölkə haqqında oxuduğu bir kitabı xatırlayıb. O deyib: "Mən 20 il əvvəl Azərbaycan və ölkə neftinin kommersiya məqsədilə istismarına dair bir kitab oxumuşdum. Bu mövzu bura məni çox cəlb etmişdi. Əlbəttə, heç vaxt Azərbaycanda olmamışdım. Bu heyranlıq illər əvvəl başlamışdı. Tale və qismətin necə işləməsi doğrudan da maraqlıdır". Kuyundziç fikrini davam etdirərək, insanın özünü təhsilli etməsi və kitab oxuması ilə həyatın fərqli olduğunu vurğulayıb. Onun Azərbaycanla bağlı xüsusi bir yaşama planı yox idi, lakin diplomatiya ilə bağlı planları vardı. Nəticədə diplomatiya yolu ilə bu ölkəyə gəlib.

Mariyana Kuyundziç çıxışında Azərbaycanın tarixi qadın fiqurlarından danışıb. O, Leyla Məmmədbəyovanı xatırladıb. Məmmədbəyova təkcə Azərbaycanın deyil, həm də Cənubi Qafqazın, Cənubi Avropanın və Ön Asiyanın ilk qadın pilotu olub. Şəfiqə Axundova Şərqdə opera bəstələyən ilk qadındır. Diplomat həmçinin Ayna Sultanovanın 1930-cu illərdə Azərbaycanın ilk qadın naziri olduğunu qeyd edib. O, cəmiyyətdəki stereotiplərə və sosial normalara meydan oxuyan Həmidə xanım Cavanşiri də misal göstərib. Səfir sonda qeyd edib ki, Avropada və bütün dünyada misilsiz qadın nümunələri mövcuddur. Uğurlu olmaq müəyyən səy tələb edir. O, gənclərin fəaliyyətini təşviq etmək istədiyini bildirib və onlara "bütün layihələrimizə, proqramlarımıza verdiyiniz dəstəyə görə" təşəkkürünü bildirib.