Manaf Cəlilzadə Baş Prokurorluğa çağırılıb

Manaf Cəlilzadə Baş Prokurorluğun İstintaq Baş İdarəsinə rəsmi bildirişlə dəvət edilib. Bu barədə İctimai Televiziya məlumat yayıb. Cəlilzadə Manaf Məmmədalı oğluna göndərilən bildirişdə onun Azərbaycan Respublikası Cinayət Prosessual Məcəlləsinin 467-13.4-cü maddəsinin tələbinə əsasən çağırıldığı qeyd olunur.

O, bu il noyabrın 24-də saat 14:00-da Binəqədi rayonu, Süleyman Sani Axundov küçəsi 160 ünvanında yerləşən Baş Prokurorluğun İstintaq Baş İdarəsinə gəlməlidir. Cəlilzadə Cinayət Məcəlləsinin 281.2-ci maddəsi ilə təqsirləndirilən şəxs qismində cəlbetmə haqqında qərar ilə üzləşir. O, istintaqdan qaçaraq Azərbaycan hüdudlarından kənarda gizləndiyi üçün barəsində ittiham elan edilməsi ilə bağlı axtarış elan olunub. Həmçinin, Binəqədi Rayon Məhkəməsinin 15 fevral tarixli qərarı ilə Cəlilzadə barəsində qiyabi həbs qətimkan tədbiri seçilib.

Sentyabrın 19-da ittihamın məzmununa əlavələr və dəyişikliklər edilib. Ərəstun Oruclu barəsində də bu tarixdə Cinayət Məcəlləsinin 220.2-ci və 281.2-ci maddələri ilə təqsirləndirilən şəxs qismində cəlb etmə haqqında qərar qəbul edilib. Manaf Cəlilzadə fevralın 17-də “Youtube” platformasında “Diktator TV” adlı kanalda Sülymanlı Süleyman və digərləri ilə qabaqcadan əlbir olan bir qrup şəxs kimi birləşib. O, canlı yayım açaraq Azərbaycanda qanuni əsaslarla formalaşmış mövcud hakimiyyətə qarşı zor tətbiqi çıxmağı təşviq edən açıq çağırışlar edib. Bildirilir ki, o, daha sonra 2023-2025-ci illərdə həmin platformadan 19 müxtəlif video hazırlayıb.

Təqsirləndirilən şəxsə xəbərdarlıq edilib. Ona izah olunub ki, çağırışa gəlmədiyi halda barəsində qiyabi icraat açıla bilər. Qiyabi hökm və ya məhkəmənin digər yekun qərarının çıxarılacağı barədə Manaf Cəlilzadə məlumatlandırılıb.