Maduro amerikalılara müharibə ilə bağlı çağırış edib

Venesuela Prezidenti Nikolas Maduro Amerika xalqına müraciət edib. O, onları Latın Amerikası və Karib hövzəsində sülhü qorumağa, eyni zamanda müharibənin qarşısını almağa çağırıb. Prezident bu müraciəti beynəlxalq hüququn müdafiəsi üzrə təşkil edilən vəkillərin iclasında səsləndirib.

Həmin görüşdə 35 ölkənin nümayəndələri iştirak edirdi. Maduro xüsusilə Birləşmiş Ştatlar xalqından Karib dənizində "dəlicəsinə müharibə" başlamaq istəyənləri dayandırmağı xahiş etdi. O bildirdi ki, ABŞ hökumətinin insan haqlarını və beynəlxalq hüququ pozması təkcə Maduroya, Venesuelaya, yaxud Cənubi Amerika və Karib hövzəsinə qarşı yönəlməyib. Bu hərəkətlər bütün bəşəriyyətə qarşıdır. Nikolas Maduro vurğuladı ki, amerikalı bacı və qardaşlar bu vəziyyətdən birinci xəbərdar olmalıdırlar.

Venesuela sülh istəyir mesajını çatdıran prezident çıxışının sonunda fikrini ingilis dilində səsləndirərək bu çağırışını gücləndirdi.