Madriddə Azərbaycanın Zəfər Günü qeyd olunub

Azərbaycanın İspaniyadakı səfirliyinin təşkilatçılığı ilə 8 Noyabr - Zəfər Gününə həsr olunan konsert proqramı və rəsmi qəbul Madriddə keçirildi. Tədbirə böyük bir heyət qatılmışdı. İştirakçılar arasında İspaniyanın Xarici İşlər, Avropa İttifaqı və Əməkdaşlıq Nazirliyindən diplomatlar, dövlət qurumlarının rəsmiləri, parlamentarilər, diplomatik korpusun nümayəndələri, eləcə də beynəlxalq təşkilatların üzvləri və yerli Azərbaycan icması vardı.

Azərbaycanın İspaniyadakı səfiri Ramiz Həsənov çıxışında bu günün əhəmiyyətindən danışdı. O vurğulayıb ki, noyabrın 8-i Azərbaycan xalqının yaddaşında ədalətin bərpa olunduğu, ərazi bütövlüyünün təmin edildiyi əlamətdar gün olaraq qalır. Səfir Azərbaycanın beynəlxalq hüququn prinsiplərinə və BMT Təhlükəsizlik Şurasının qətnamələrinə uyğun olaraq öz suverenliyini bərpa etməsinə diqqət çəkdi. O, otuz ilə yaxın davam edən münaqişəyə son qoyulmasının əhəmiyyətindən danışdı.

Həsənov 2025-ci il avqustun 8-də Azərbaycan və Ermənistan arasında imzalanmış Birgə Bəyanatın və sülh sazişinin paraflanmasının bölgədə sülhə doğru atılmış mühüm bir addım olduğunu bildirdi. Bu addım barışıq və normallaşma istiqamətində irəliləyişi göstərir. Rəsmi çıxışlardan sonra tədbir bədii hissə ilə davam etdi. "Sülhün səsi" adlanan konsertdə Azərbaycanın tanınmış tarzəni, Əməkdar artist Şəhriyar İmanov, pianoçu, caz ustası və bəstəkar Etibar Əsədli zəngin musiqi proqramı ilə qonaqların qarşısına çıxdılar.