Macarıstan ABŞ-dan HIMARS raket sistemi və digər silahlar almağı planlaşdırır

Macarıstan hökuməti Amerika Birləşmiş Ştatlarından (ABŞ) HIMARS çoxnövlü raket sistemləri və bir sıra başqa müasir silahlar almağı planlaşdırır. Bu satınalma planı ölkənin hərbi gücünü artırmaq məqsədi daşıyır.

Bu barədə məlumatı Baş nazir Viktor Orbanı Vaşinqtona səfərində müşayiət edən müdafiə naziri Kriştof Szalay-Bobrovnitski açıqlayıb. Budapeştə qayıdarkən macar jurnalistlərə müsahibə verən nazir bildirib ki, HIMARS sistemi ölkənin silahlı qüvvələrinin növbəti 10 illik inkişaf planına daxil edilib. O əlavə edib ki, bu sistem Macarıstanın strateji imkanlarını genişləndirmək potensialına malikdir.

Jurnalistlər nazirə daha əvvəl mediada Macarıstanın ABŞ-dan təxminən 20-24 ədəd HIMARS almaq niyyəti barədə yayılan məlumatları xatırladıblar. Szalay-Bobrovnitski təklif olunan müqavilənin təxminən həmin məbləğə bərabər olduğunu təsdiqləyib. O, Pentaqonda Amerika silahlarının alınması ilə bağlı danışıqlar apardığını qeyd edib. Lakin o vurğulayıb ki, ABŞ Konqresi də daxil olmaqla, fərqli icazələrin tələb olunması səbəbindən bu danışıqlar yaxın zamanda Macarıstanda yekunlaşmayacaq.