Londonda “Zəfər Salnaməsi” adlı tədbir keçirilib (FOTO)

Azərbaycanın Zəfər Günü münasibətilə Böyük Britaniyanın paytaxtı Londonda “Zəfər Salnaməsi” adlı tədbir baş tutub. Bu tədbir Britaniya Azərbaycanlıları Assosiasiyasının (BAA) təşkilatçılığı, həmçinin Azərbaycan Respublikasının Diasporla İş üzrə Dövlət Komitəsinin dəstəyi ilə keçirilib. Tədbirə Dövlət Himninin səsləndirilməsi ilə start verilib. Ardınca qəhrəman şəhidlərin əziz xatirəsi bir dəqiqəlik sükutla yad edilib.

Diaspor fəalı və “Bülbül Azərbaycan dili” kitabının müəllifi Emiliya Cəbrayılova açılış nitqində çıxış edib. O, bu mərasimin sadəcə tarixi bir anı xatırlamaqdan ibarət olmadığını bildirib. Məqsəd xalqın qürurunu, qəhrəmanlığını və milli birliyini təntənə ilə qeyd etməkdir.

Tədbirdə Britaniya Azərbaycanlıları Assosiasiyasının rəhbəri Hafiz Baxşəliyev, Azərbaycanın Böyük Britaniyadakı səfiri Elin Süleymanov və Türkiyənin Böyük Britaniyadakı səfiri Koray Ertaş iştirak edərək çıxışlar ediblər. Həmçinin ADPU-nun elm və innovasiyalar üzrə prorektoru Asəf Zamanov və Diasporla İş üzrə Dövlət Komitəsinin əməkdaşı Ləman Əliyeva da danışıb. Çıxışlarda xalqın əzmkarlığı, həmrəyliyi və Müzəffər Ali Baş Komandan, Prezident İlham Əliyevin müdrik rəhbərliyi nəticəsində Vətən müharibəsində qazanılan tarixi Qələbə xüsusi vurğulanıb.

Mərasimin bədii hissəsi tanınmış ifaçıların iştirakı ilə davam etdi. Rasim Fərziyev və ansamblı, Emiliya Yaqubova, Fərhad Amiri Azərbaycanın xalq mahnılarını və bəstəkar musiqilərini ifa ediblər. Tədbirdə, eyni zamanda, Eldar Əzizovun müəllifliyi ilə hazırlanan bir kitabın təqdimatı da keçirildi. “The History of the Patriotic War: Personality Factor” (“Vətən müharibəsinin tarixi: şəxsiyyət faktoru”) adlı bu nəşr 44 günlük müharibənin xronikasını, şəhidlərin qəhrəmanlığını, Qələbənin siyasi-hərbi aspektlərini işıqlandırır. Londonda keçirilən bu hadisə Azərbaycan diasporunun birlik, qürur və milli həmrəylik ruhunu bir daha nümayiş etdirdi.