Kuba ABŞ-ni Venesuela hava məkanına müdaxilə etməkdə günahlandırıb

Kuba hökuməti ABŞ-ı Karib dənizi bölgəsində, xüsusən də Venesuela üzərindəki səmada elektromaqnit müdaxiləsi yaratmaqda günahlandırır. Kubanın xarici işlər naziri Bruno Rodriqes Parrilya bu məlumatı “X” sosial şəbəkəsində açıqlayıb. O qeyd edib ki, bu cür müdaxilə birbaşa ABŞ hərbi müdaxiləsinin nəticəsidir.

Kuba diplomatı Birləşmiş Ştatların bölgədəki aqressiv və ifrat hərbi yerləşdirilməsini sərt şəkildə pisləyib. Nazir vurğulayıb ki, bu hərbi yerləşdirmə Karib dənizində və xüsusən də Venesuela hava məkanında davamlı elektromaqnit müdaxiləsinə səbəb olur.

Parrilya əlavə edib ki, bu müdaxilə tək bir hadisə deyil. O, Venesuelaya qarşı yönəlmiş daha böyük bir hərbi eskalasiyanın və “psixoloji müharibənin” bir hissəsidir. Nazir bildirib ki, bu hərəkətlərin əsas məqsədi Venesuelanın “qanuni hökumətini zorla devirmək”dir.