Komitə sədri: Məktəblər direktorluğuna namizədlərlə bağlı kadr bankı formalaşdırmaq lazımdır

Milli Məclisin İctimai birliklər və dini qurumlar komitəsinin sədri Fazil Mustafa məktəb direktorlarının seçimi metodikasının sadələşdirilməsini təklif edib. O, həmçinin xaricdə təhsil alan tələbələrin ölkəyə qayıtdıqdan sonra işlə təmin olunması məsələsinə də toxunub.

Fazil Mustafa parlamentin plenar iclasında çıxış edərkən bildirib ki, hazırda 600 məktəbdə direktor vəzifəsi boşdur. Bu məlumat Elm və Təhsil nazirinin də açıqlamaları ilə təsdiqlənir. Komitə sədri bu vəziyyətlə əlaqədar direktorluğa namizədlərlə bağlı kadr bankı formalaşdırmağı zəruri hesab edir. Belə bir sistem ehtiyac yarandıqda idarəçiləri tez bir zamanda seçməyə kömək edərdi.

Mustafa direktor seçimi üçün tətbiq edilən metodologiyanı tənqid edib. Onun sözlərinə görə, hər dəfə yeni prosedurlar tətbiq olunur. "Bir direktoru seçmək nədir ki, onun üçün bu qədər prosedur keçilməlidir?" deyə komitə sədri sual verib. O, uzun və mürəkkəb prosedurların tətbiqini lüzumsuz sayır. Bunun yerinə, məktəbdə sadə rəy sorğusu keçirib on ildən çox stajı olanlardan birini direktor təyin etmək mümkün olar. Digər bir seçim variantı isə əvvəldə qeyd olunan namizədlər bankından lazım olan şəxsi seçib təyin etməkdir.

Komitə sədri təhsil sahəsindəki digər bir mühüm məsələyə-xaricdə təhsil alan tələbələrin işlə təmin olunması probleminə də diqqət çəkib. O qeyd edib ki, hazırda yüz milyonlarla vəsait xərcləyərək xaricdə tələbə oxutdururuq. Ancaq onların ölkəyə qayıtdıqdan sonra işlə təmin edilməsi çətinliyə çevrilib. Mustafa bu şəxslərin valideynləri köməklik etməsə və ya özləri təşəbbüs göstərməsə, iş tapa bilmədiklərini vurğulayıb. Onun fikrincə, dövlətin xərclədiyi vəsaitin boşa getməməsi üçün bu problemləri həll etmək vacibdir.