KİV: Rusiya Suriyadakı aviabazaya uçuşları bərpa edib

Rusiya Suriyadakı hakimiyyət dəyişikliyindən sonra ilk dəfə olaraq Latakiya əyalətində yerləşən Hmeymim aviabazasına uçuşları yenidən başlayıb. Bu addım Moskva ilə Dəməşq arasındakı əlaqələrin yeni mərhələyə qədəm qoyduğunu göstərir.

Bu məlumatı "Bloomberg" agentliyi yayıb. Agentlik məlumatları həm "Flightradar24" saytının uçuş izləmə məlumatlarına, həm də Kremlə yaxın mənbələrə əsaslandırıb. "Flightradar24"dən alınan məlumatlara görə, bazanın yerləşdiyi Suriyanın Latakiya şəhərinə azı iki Rusiya təyyarəsi uçuş həyata keçirib. Bu, aviasiya əlaqələrinin rəsmi olaraq bərpasının ilk əlaməti sayılır.

Uçuşların bərpası iki ölkə arasındakı yüksək səviyyəli diplomatik danışıqlardan dərhal sonra baş verir. Rusiya və Suriya prezidentləri Vladimir Putin və Əhməd əş-Şəraa oktyabrın 15-də Kremldə görüşmüşdülər. Bu sammit Suriyada baş verən son siyasi dəyişikliklər fonunda olduqca əhəmiyyətlidir.