Kislitsa: ABŞ və Ukrayna sülh planını yeniləyərək onu 19 bəndə salıblar

ABŞ və Ukrayna tərəfləri 19 bənddən ibarət olan yenilənmiş sülh sazişi layihəsini hazırlayıblar. Mətbuat orqanlarının yazdığına görə, siyasi cəhətdən həssas sayılan bəzi məsələlər sonradan iki ölkə lideri tərəfindən razılaşdırılacaq. Bu məlumatı Ukraynanın xarici işlər nazirinin birinci müavini Sergey Kislitsa "The Financial Times"a verib. Kislitsa, Cenevrədəki danışıqlarda Ukrayna nümayəndə heyətinin tərkibində iştirak edirdi. O, görüşün intensiv və məhsuldar olduğunu bildirib. Kislitsa qeyd etdi ki, tərəflər hər iki dövlətin maraqlarını təmin edən, yenidən işlənmiş sənəd layihəsi üzərində razılığa gəliblər.

Danışıqlar nəticəsində bir sıra mübahisəli bəndlər – xüsusən ərazi məsələləri və NATO, Rusiya və ABŞ arasındakı münasibətlər – sonrakı müzakirələrə saxlanıldı. Bu məsələlər ABŞ Prezidenti Donald Tramp və Ukrayna lideri Volodimir Zelenski tərəfindən müzakirə ediləcək. Nazir müavini vurğulayıb ki, Ukrayna tərəfi ərazi güzəştləri ilə bağlı qərar qəbul etmək mandatına malik deyildi. Ölkə Konstitusiyasına görə, belə bir qərar ümummilli referendum tələb edir.

Kislitsa həmçinin yenilənmiş layihənin əvvəlcə mətbuata sızmış sülh planı variantına çox az bənzədiyini söylədi, əlavə edərək ki, "ilkin versiyadan çox az şey qalıb". Ukrayna ordusunun sayının məhdudlaşdırılması və mümkün hərbi cinayətlərə ümumi amnistiya ilə bağlı təkliflər Kiyevin mövqeləri nəzərə alınaraq yenidən işlənib. İndi hər bir tərəf aktual işçi variantını öz liderlərinə – Vaşinqtonda və Kiyevdə təqdim edəcək. Kislitsanın sözlərinə görə, Tramp administrasiyası bundan sonra danışıqlar prosesini irəlilətmək məqsədilə Moskvaya müraciət etməyi planlaşdırır.