Kiçik problemlər vaxtında həll olunmadıqda sistemli narazılıq yaranır - Vüqar Qurbanov

Tibbi Ərazi Bölmələrini İdarəetmə Birliyi (TƏBİB) tabeli tibb müəssisələrinin fəaliyyətinə dair növbəti geniştərkibli müşavirə keçirib. İcraçı direktor Vüqar Qurbanovun sədrliyi ilə baş tutan görüşdə idarəetmənin təkmilləşdirilməsi, mövcud problemlərin həlli yolları və yeni çağırışlara çevik yanaşmanın təmin edilməsi müzakirə edilib. Müşavirədə TƏBİB-in struktur bölmələrinin rəhbərləri və tibb müəssisələrinin direktorları iştirak ediblər.

Vüqar Qurbanov çıxışında bildirib ki, xəstəxanalarda aparılan son struktur dəyişiklikləri, klinik proseslərin təkmilləşdirilməsi və icbari tibbi sığorta ilə bağlı yeni qaydalar rəhbər heyətin fəaliyyətinə yüksək tələblər qoyur. O vurğulayıb ki, keyfiyyətli tibbi xidmət, pasiyentlərin təhlükəsizliyi və nəticəyönümlülük prinsipləri hər bir tibb müəssisəsinin gündəlik prioritetinə çevrilməlidir. İcraçı direktor III MDB Oyunları və "Formula-1" yarışları zamanı göstərilən yüksək tibbi xidmətə görə aidiyyəti tibb müəssisələrinə xüsusi təşəkkürünü çatdırıb.

Tədbirdə TƏBİB rəhbərliyi və departament müdirləri hesabat xarakterli çıxışlarla çıxış ediblər. Tibbi sığorta departamentinin rəhbəri Səbinə Quliyeva icbari tibbi sığortanın tətbiqindəki təşkilati məsələlər, xidmətlərin düzgün kodlaşdırılması və maliyyə mexanizmlərinin təkmilləşdirilməsi istiqamətində görülən işlər barədə məlumat verib. İctimaiyyətlə əlaqələr və kommunikasiya departamentinin rəhbəri Zamirə Ədilova xəstəxanaların media ilə əməkdaşlığında peşəkar yanaşmanın gücləndirilməsinin vacibliyini qeyd edib. Həmçinin, TƏBİB-in Komissiya sədri Çiçək Əhmədova xroniki böyrək çatışmazlığı olan xəstələr üçün dializ xidmətlərinin təşkilində əldə olunan nəticələr və mövcud çətinliklər haqqında danışıb.

Müraciətlərlə iş departamentinin rəhbəri İlham Hüseynov vətəndaş müraciətlərinin analizi ilə bağlı hesabat təqdim edərək şikayətlərin dinamikasını açıqlayıb. Bütün məruzələri dinlədikdən sonra Vüqar Qurbanov bildirib ki, vətəndaş məmnuniyyəti TƏBİB-in fəaliyyətində əsas hədəf olmalıdır. O, "Kiçik problemlər vaxtında həll olunmadıqda sistemli narazılıq yaranır. Bizim işimizin keyfiyyətinin əsas meyarı vətəndaş məmnuniyyətidir", - deyə vurğulayıb. Kurum rəhbəri qeyd edib ki, əsas məqsəd vətəndaşlara daha keyfiyyətli, əlçatan və operativ tibbi xidmət göstərməkdir. O, hər bir rəhbərin və kollektivin öz məsuliyyətini dərk etməli olduğunu əlavə edib. İcraçı direktor gələn ay Bakı şəhərində ilin yekunlarına həsr edilmiş geniştərkibli müşavirə keçiriləcəyini də açıqlayıb.