İtaliyanın "Corriere della Sera" qəzeti Lavrovla müsahibənin dərcindən imtina edib

İtaliyanın "Corriere della Sera" qəzeti Rusiya xarici işlər naziri Sergey Lavrovla hazırlanan müsahibəni dərc etməkdən imtina edib. Nəşr bu qərarı Lavrovun sözlərində faktların yoxlanılmasını və əlavə izahları tələb edən çoxlu sayda "mübahisəli iddiaların" olduğunu bildirərək əsaslandırıb.

Bu hadisə Rusiya Xarici İşlər Nazirliyi (XİN) tərəfindən ictimaiyyətə bildirilib. Nazirlik son aylarda Rusiyaya dair onsuz da çox olan saxta məlumatların artdığını qeyd edib. Bu yalan axınını bir qədər dayandırmaq üçün Rusiya XİN İtaliyanın aparıcı qəzetlərindən biri olan "Corriere della Sera"ya Sergey Lavrovla eksklüziv müsahibə təklif etmişdi.

XİN-in açıqlamasına görə, qəzetin redaksiyası bu təklifi həvəslə qəbul edib. Onlar nazirə geniş suallar göndərdi və Lavrov hər birinə ətraflı cavab verdi. Müsahibə mətni operativ şəkildə hazırlandı və dərc edilməyə tam hazır idi. Lakin nəşr Lavrovun cavablarını yerləşdirməkdən son anda imtina etdi. Rusiya XİN bu hərəkəti "Corriere della Sera" tərəfindən həyata keçirilən açıq senzura kimi qiymətləndirib.