İstifadəçilərin NƏZƏRİNƏ: Saxta “Tiktok” və “Youtube” tətbiqləri ilə virus yayılır

İnternet məkanında istifadəçilərə qarşı ciddi kiber təhlükə ilə bağlı xəbərdarlıq edilib. “Daha geniş” və ya “18+” versiyaları adı altında saxta “TikTok” və “YouTube” proqramları aktiv şəkildə yayılır. Bu barədə kibertəhlükəsizlik sahəsində çalışan “F6” şirkətinin mütəxəssisləri məlumat yayıb.

Mütəxəssislər həmin tətbiqlərin daxilində troyan tipli virusların yayıldığını bildirirlər. Məlumata görə, zərərli proqramların reklamı müxtəlif saytlarda yerləşdirilir. Bu yolla kiberhücumçular daha çox insanın cihazlarına yoluxmasına nail olurlar. F6 əməkdaşları apardıqları araşdırma nəticəsində tapa bildikləri ziyanlı proqramların adlarını təqdim ediblər. Bu siyahı saxta “YouTube” proqramlarının çoxlu sayda fərqli versiyalarını əhatə edir.

Aşkarlanan tətbiqlərin adları aşağıdakılardır: “TikTok 18+”, “YouTube Max”, “YouTube Boost”, “YouTube Mega”, “YouTube Ultra”, “YouTube Plus”, “YouTube Ultima Edition”, “YouTube Pro” və “YouTube Advanced”. Bu adların sırasında Kiril əlifbası ilə yazılmış “Ютуб плюс” proqramı da yer alır. İstifadəçilər bu tipli proqramlara rast gəldikdə çox diqqətli olmalıdırlar. Eyni zamanda, kibertəhlükəsizlik mütəxəssisləri internetin Rusiya seqmentində də viruslu tətbiqlər aşkarlayıblar. Bu proqramlar “Cərimələrin ödənilməsi”, “Tıxacsız” və “EasyRide” adları altında yayılıb. Rəsmi mənbələrdən kənar proqramların yüklənməsi hər zaman yüksək risk daşıyır.