İRİA rəsmisi: "Gənclər üçün müxtəlif proqramlar həyata keçirilir"

İnnovasiya və Rəqəmsal İnkişaf Agentliyi (İRİA) İnformasiya Kommunikasiya Texnologiyaları (İKT) sektorunda gənclərin formalaşdırılmasına xüsusi diqqət yetirir. Agentlik onların beynəlxalq səviyyəli biliklərə yiyələnməsi üçün fərqli proqramlar reallaşdırır. Agentliyin İdarə Heyətinin sədr müavini Rəşad Xalıqov bu barədə qurumun təşkilatçılığı ilə Bakıda keçirilən "İKT Karyera Sərgisi"ndə danışıb.

Xalıqovun sözlərinə görə, indiyə qədər 10 mindən çox şəxsin qısa və ya uzun müddətli proqramlardan keçərək biliklərə sahib olmasına şərait yaradılıb. Onlar həmçinin beynəlxalq səviyyəli şirkətlərdə təcrübə qazanmaq imkanı əldə ediblər. Bu məqsədlə İRİA bir çox layihələr icra edib. Rəşad Xalıqov vurğulayıb ki, bu layihələr Azərbaycanda yeni dövr üçün insan kapitalı baxımından əhəmiyyətli işlərdən biridir.

Agentlik rəsmisi xüsusilə ABŞ-də bu sahədə ixtisaslaşan şirkətlərin ölkəyə gətirilməsi strategiyasını qeyd edib. Bu işlərin əsas məqsədi xarici bilik və bacarıqların ölkəyə transfer olunması, eyni zamanda yerli gənclərin formalaşdırılmasıdır. R.Xalıqov bu çərçivədə ABŞ-nin nüfuzlu Anderson şirkəti ilə yeni bir proqram təsis edildiyini açıqlayıb. Hazırda 200-dən çox gənc ən yüksək səviyyəli bilik və bacarıqlar əldə etmək üçün birillik proqram keçir. Bu proqramlar mütəmadi olaraq davam etdirilir.

R.Xalıqov əlavə edib ki, İRİA proqramların uğurlu şəkildə həyata keçirilməsi üçün ölkədə fəaliyyət göstərən şirkətlər və ali təhsil müəssisələri ilə əməkdaşlıq edir. Onun fikrincə, bu cür əməkdaşlıq çox əhəmiyyətlidir. Agentlik Azərbaycanda fəaliyyət göstərən şirkətlər və universitetlər ilə birlikdə belə layihələri davamlı olaraq icra edir.