İrakli Kobaxidze: Builki forumda Azərbaycan və Ermənistan Baş nazirlərinin iştirakından çox şadıq

Gürcüstanın Baş naziri İrakli Kobaxidze V Tbilisi İpək Yolu Forumunda Azərbaycan və Ermənistan Baş nazirlərinin – Əli Əsədovla Nikol Paşinyanın iştirak etməsindən məmnunluq duyduğunu bildirib. O, builki tədbirə hər iki Baş nazirin qatılmasının xüsusi önəm daşıdığını söyləyib. Kobaxidze vurğulayıb: "Biz çox şadıq ki, bu mühüm tədbirdə strateji tərəfdaşlarımız – Azərbaycan və Ermənistanın Baş nazirləri bizimlə birgədir".

İ.Kobaxidze qeyd edib ki, forum iqtisadi əməkdaşlığın və qlobal əlaqələrin daha da gücləndirilməsi üçün mühüm bir dövrdə keçirilir. O, tarixi İpək Yolunun qitələr arasında ticarət və mədəni əlaqələrin formalaşmasında böyük bir funksiya daşıdığını xatırladıb. Bu gün Orta Dəhliz həmin marşrutun müasir davamı olaraq Avropa ilə Asiyanı etibarlı və səmərəli əlaqə ilə birləşdirir.

Baş nazir əlavə edib ki, Gürcüstanın coğrafi mövqeyi ölkəni Şərqlə Qərb arasında vacib tranzit qovşağına çevirib. Bu vəziyyət regional əməkdaşlığın və iqtisadi dayanıqlığın möhkəmlənməsində mühüm bir amildir. Kobaxidze Azərbaycan və Ermənistan liderlərinin iştirakının regional əlaqələrə verdiyi töhfəni də bu kontekstdə dəyərləndirib.