İlin ilk ay tutulması başlayır

2026-cı ilin ilk Ay tutulması hadisəsi başlayır. N.Tusi adına Şamaxı Astrofizika Rəsədxanasının verdiyi məlumata görə, bu təbiət hadisəsi bu gün saat 12:44-də başlayacaq və axşam saat 18:23-də başa çatacaq. Tutulmanın maksimum həddi isə saat 11:33-ə təsadüf edəcək. Bu dəfəki hadisə Tam Ay tutulması olaraq qeyd edilir. Bu maraqlı prosesi Asiya, Avstraliya, Şimali və Cənubi Amerika, Arktika və Antarktida ərazilərindən izləmək mümkün olacaq. Həmçinin Sakit, Atlantik və Hind okeanı bölgələri də bu mənzərəyə şahidlik edə biləcək. Lakin Azərbaycan ərazisində Ay üfüqdən aşağıda olduğu və günün işıqlı vaxtına düşdüyü üçün bu hadisəni görmək mümkün olmayacaq.

Ay tutulması prosesi zamanı Yer kürəsi Günəşlə Ayın arasına keçir. Bu vəziyyət Günəş işığının Ay səthinə birbaşa çatmasının qarşısını alır və Yerin kölgəsi Ayın üzərinə düşür. Ay tutulmaları adətən Günəş tutulmalarından daha uzun çəkir, çünki Yerin kölgə sahəsi Ayın kölgəsindən daha böyükdür. Belə təbiət hadisələri yalnız tam Ay fazası zamanı baş verir. Tam Ay tutulması təxminən 105 dəqiqəyə qədər davam edə bilir. Günəş tutulmasından fərqli olaraq, Ay tutulmasını Ayın üfüqdən yuxarıda olduğu hər yerdən izləmək olar.

Xalq arasında "Qanlı Ay" kimi tanınan hadisə də məhz tam Ay tutulması zamanı reallaşır. Bu vaxt Ayın rəngi qırmızı çalara bürünür. Bunun əsas səbəbi tutulma zamanı Yer atmosferindən keçən Günəş şüalarının yalnız uzun dalğalı hissəsinin Ayın səthinə çatmasıdır. Qeyd edək ki, Ay tutulmasının üç fərqli növü mövcuddur. Tam Ay tutulması zamanı Ay tamamilə Yerin kölgəsinə keçir. Qismən tutulmada Ay Yerin kölgəsinə ancaq bir hissəsi ilə daxil olur. Yarımkölgəli tutulmada isə Ay yalnız Yerin yarımkölgəsindən keçir ki, bu zaman yaranan rəng dəyişikliyini insan gözü ilə seçmək kifayət qədər çətin olur.