Hindistan sahillərini zəhərli köpük örtüb

Hindistanın Çennai sahilləri musson yağışlarından sonra zəhərli köpüklə örtülüb. Mütəxəssislərin məlumatına görə, bu hadisə Çennai şəhərinin ekoloji problemlərini bir daha gündəmə gətirir. Köpük Pattinambakkamda, Adyar çayının mənsəbinin yaxınlığında əmələ gəlib. Bu, şəhər kanallarından gələn yağış sularının çayın suyuna qarışdığı yerdə baş verib.

Mütəxəssislər köpüyün yaranmasını ağır kimyəvi maddələrin və fosfatların qarışması ilə əlaqələndirirlər. Bu vəziyyət əsasən insan tullantıları və təmizlənmədən çaya axıdılan sənaye tullantıları səbəbilə yaranır. Bu cür kimyəvi çirklənmə suyun tərkibini ciddi şəkildə dəyişir, nəticədə geniş əraziləri əhatə edən zəhərli köpük meydana gəlir.

Köpük ilk baxışdan zərərsiz görünsə də, onun təsirləri ciddi narahatlıq yaradır. Səhiyyə orqanları xəbərdarlıq edir ki, bu köpüyə uzun müddət məruz qalmaq ağır dəri xəstəliklərinə səbəb ola bilər. Eyni zamanda, ekoloqlar dəniz həyatını zəhərləyəcək və reproduktiv dövrü pozacaq bu hadisənin ekosistemə vurduğu zərərdən narahatdırlar.