Heydər Əliyev Fondunun vitse-prezidenti Leyla Əliyeva Lənkəranda internat məktəbində olub (FOTO)

Heydər Əliyev Fondunun vitse-prezidenti Leyla Əliyeva noyabrın 21-də Lənkəran şəhərində yerləşən Sağlamlıq imkanları məhdud uşaqlar üçün xüsusi internat məktəbinə səfər edib. Ona bu ziyarət zamanı Alena Əliyeva da yoldaşlıq edirdi. Onlar internat məktəbinin şagirdləri və müəllimləri ilə birlikdə, əvvəlcə, tarixi Zəfərin 5 illiyinə həsr edilmiş əl işlərindən ibarət sərgiyə baxış keçirdilər. Bu sərgi şagirdlərin yaradıcılıq bacarıqlarını və bayram sevincini əks etdirirdi.

Bu internat məktəbi cənub bölgəsində yeganə fəaliyyət göstərən, regional əhəmiyyətli müəssisədir. Məktəb sağlamlıq imkanları məhdud uşaqların xüsusi ehtiyaclarını qarşılamaq üçün qurulub. Buraya autizm və Daun sindromu olan uşaqlar, eləcə də əqli inkişafdan geri qalan uşaqlar daxildir. Mütəxəssislər uşaqların həm təhsil almasını, həm də onların reabilitasiya prosesini təmin edirlər. Bu sistem uşaqlara ictimai həyata qatılmaq üçün vacib olan bilikləri və bacarıqları qazanmağa yardım edir.

Leyla Əliyeva səfər zamanı sinif otaqlarında, məşğələ və istirahət otaqlarında olaraq uşaqların asudə vaxtının təşkili proseslərini izlədi. Məktəb uşaqların yalnız təhsil alması üçün deyil, həm də daimi qalması üçün şərait yaradıb. Hazırda 34 uşaq bu məktəbdə qalma imkanından yararlanır. Fondun vitse-prezidentinin Lənkərandakı bu səfəri xüsusi qayğıya ehtiyacı olan uşaqların təhsil və sosial rifah şəraitinə göstərilən diqqətin əhəmiyyətini vurğulayır.