Gürcüstanın Baş naziri Almaniya səfirinin fəaliyyətini tənqid edib

Gürcüstanın Baş naziri İrakli Kobaxidze Almaniyanın ölkədəki səfiri Peter Fişerin fəaliyyətini sərt tənqid edib. Baş nazir diplomatı dəfələrlə Vyana Konvensiyasının konkret tələblərini kobud şəkildə pozmaqda ittiham edir. Kobaxidze bu bəyanatı Acarıstan İctimai Televiziya və Radio Yayım Xidmətinin "Azad Məkan" proqramında səsləndirib.

İrakli Kobaxidzenin sözlərinə görə, səfirin hərəkətləri istənilən diplomatik standartlara tamamilə ziddir. O bildirib ki, Peter Fişerin davranışı o qədər məsuliyyətsiz hala gəlib ki, hökumət artıq bu cür hərəkətlərə ciddi əhəmiyyət verib-verməməkdə tərəddüd edir. Baş nazir hesab edir ki, diplomatik fəaliyyətdə bu cür səhvlərə yol vermək qəbuledilməzdir və səfirin fəaliyyəti tənqid olunmalıdır.

Hökumət başçısı qeyd edib ki, Gürcüstan tərəfindən səfirə qarşı gələcəkdə diplomatik addımların və ya prosedurların atılması istisna olunmur. Kobaxidze vurğulayıb ki, Xarici İşlər Nazirliyi bu məsələ ilə bağlı yekun qərarı verəcək. O əlavə edib ki, bu qərarın verilməsindən əvvəl məsləhətləşmələr aparıla bilər. Bu vəziyyət Almaniya ilə diplomatik münasibətlərə təsir edə biləcək ciddi bir məsələdir.