Güclü maqnit qasırğası riski var – İnternet və peyklərin işində pozuntular yarana bilər

Yer kürəsində hazırda güclü maqnit qasırğası riski mövcuddur. Belə bir hadisə peyklərin, internetin və elektrik şəbəkələrinin normal işində ciddi nasazlıqlara səbəb ola bilər. Xarici KİV-lərə istinadən verilən məlumata görə, Günəşdə iri bir ləkə müşahidə olunur. Bu ləkə 1859-cu ildə astronom Riçard Kerrinqton tərəfindən qeydə alınan analoji hadisəyə bənzəyir. Alimlər bu aktivliyin Yerə təsir edə biləcək güclü partlayışlar ehtimalını artırdığını bildirirlər. Texnologiyadan asılı olan sistemlərin kütləvi şəkildə sıradan çıxma ehtimalı insanları narahat edir.

Tarixdə qeydə alınmış ən güclü günəş qasırğalarından biri 1859-cu ilin sentyabr ayında baş vermişdi. Həmin vaxt Yer həqiqətən də çox böyük bir günəş qasırğası ilə üzləşmişdi. Bu qasırğanın nəticəsində Şimal işıqları bütün dünyada, hətta Karib hövzəsi, Bahama və Havay adaları üzərində belə görünmüşdü. Hadisənin miqyası çox böyük idi. Avropa və Şimali Amerikada teleqraf sistemləri tamamilə sıradan çıxmış, bir çox stansiyalar yanmışdı. 1859-cu ilin Kerrinqton hadisəsi adlandırılan bu fəlakət indiki dövr üçün də ciddi bir xəbərdarlıq hesab edilir.

Mütəxəssislər hazırkı vəziyyəti dəyərləndirərək Günəşdə iki günəş ləkəsinin müşahidə olunduğunu qeyd edirlər. Bu ləkələr bir-birinə o qədər yaxın yerləşir ki, kənardan nəhəng bir ləkə kimi görünürlər. Onların yaxın məsafədə olması güclü alışmaların ehtimalını artırır. Hesablamalara əsasən, intensivliyinə görə 1859-cu ildəki "Kerrinqton hadisəsi"nə bərabər ola biləcək bir maqnit qasırğası baş verərsə, peyklərin, internetin və elektrik şəbəkələrinin işində böyük nasazlıqlar yarana bilər. Belə bir təsir müasir cəmiyyət üçün ciddi fəsadlar deməkdir.