Gələn il 25 minə yaxın müəllimin sertifikasiyaya cəlb olunması gözlənilir

Elm və təhsil naziri Emin Əmrullayev gələn il üçün müəllimlərin sertifikasiya prosesi ilə bağlı yeni hədəfləri açıqlayıb. Nazirin verdiyi məlumata görə, 2026-cı ildə təxminən 25 minə yaxın müəllimin sertifikasiyaya cəlb olunması planlaşdırılır.

Bu açıqlama Milli Məclisin Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında, 2026-cı il dövlət büdcəsinin müzakirəsi zamanı səsləndirilib. Nazir qeyd edib ki, növbəti il ərzində müəllimlərin artıq böyük əksəriyyətinin sertifikasiyadan keçməsi prosesini yekunlaşdırmış olacaqlar. Bu, ölkə üzrə pedaqoji kadrların qiymətləndirilməsi işində mühüm bir mərhələnin tamamlanması deməkdir.

Emin Əmrullayev indiyədək həyata keçirilmiş işlərin nəticələrini də bildirib. Hazırda sertifikasiya prosesinə ümumilikdə 84 minə yaxın müəllim cəlb olunub. Onlardan uğurla keçən 73 min müəllimin əməkhaqqına əlavə ödənişlər tətbiq edilib. Gələn il prosesə cəlb olunması nəzərdə tutulan əlavə 25 min müəllimin ödənişləri də daxil olmaqla, ümumilikdə müəllimlərin əməkhaqqına əlavələr üçün böyük həcmdə vəsait ayrılması proqnozlaşdırılıb. Proqnoza görə, gələn il bu məqsədlə təxminən 213 milyon manat vəsait xərclənəcək. Bu maliyyə dəstəyi müəllimlərin peşəkar hazırlığının və əməkhaqqının artırılmasına birbaşa yönəlib.