Füzuli Şəhəri Günü münasibətilə tədbirlər keçirilib - FOTO

Füzuli şəhərində Füzuli Şəhər Günü münasibətilə tədbirlər keçirilib.

Tədbirlər Mədəniyyət Nazirliyinin, Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəliyinin, eləcə də Qarabağ Dirçəliş Fondunun təşkilatçılığı ilə baş tutur.

Proqram çərçivəsində Füzuli şəhərində yerləşən Kurmanqazı adına Uşaq Yaradıcılıq Mərkəzində “Zəfərin ruhu” adlı fotosərgi açılıb. Burada təsviri sənət üzrə ustad dərsləri də keçirilib.

Fotosərgidə Azərbaycan Ordusunun birinci və ikinci Qarabağ müharibəsində keçdiyi döyüş yolunu əks etdirən fotolar göstərilir. Ustad dərslərində təsviri sənət üzrə əl işləri nümayiş edilir.

Bundan əlavə, Mirzə Uluqbəy adına 1 nömrəli tam orta məktəbdə uşaqlar Füzuli Dövlət Dram Teatrının hazırladığı "Çəkməli pişik" tamaşasına baxıblar.

Tədbirlər planına əsasən, şəhərdə konsert proqramı və atəşfəşanlıq da planlaşdırılır.

Füzuli şəhəri 44 günlük Vətən müharibəsi zamanı, 2020-ci il oktyabrın 17-də işğaldan azad edilib.

Prezident İlham Əliyev 31 iyul 2023 -cü il tarixində Sərəncam imzalayıb. Bu Sərəncam “Azərbaycan Respublikasının işğaldan azad edilmiş əraziləri üzrə şəhər günlərinin təsis edilməsi haqqında” adlanır. Sərəncama görə, 17 Oktyabr hər il təntənəli şəkildə Füzuli Şəhəri Günü kimi qeyd edilir. Bu addım Vətən müharibəsində qazanılmış tarixi qələbəni əbədiləşdirmək məqsədi daşıyır.