Fransada etirazla qarşılanan pensiya islahatının icrası təxirə salınıb

Fransa Milli Assambleyasının (parlamentin aşağı palatası) deputatları, pensiya yaşının 62-dən 64-ə qaldırılmasını nəzərdə tutan geniş etirazlara səbəb olmuş pensiya islahatının icrasını təxirə salan düzəlişi qəbul ediblər. Bu qərar islahatın 2027-ci ilə qədər dayandırılması deməkdir. Səsvermə nəticələrindən sonra aşağı palatanın spikeri Yael Braun-Pive assambleyanın saytında yayımlanan iclasda "Düzəliş qəbul edildi" deyə bildirib. Bu hadisə Fransanı pensiya yaşının artırılmasından müvəqqəti olaraq imtina edən dünyada ilk ölkə edib.

Ümumilikdə səsvermədə 505 deputat iştirak edib. Pensiya islahatının dayandırılması ilə bağlı layihənin lehinə 255 deputat səs verib, 146 nəfər əleyhinə çıxış edib. Digər 104 deputat isə bitərəf qalıb. Bu qərar cəmiyyətdə böyük narazılığa səbəb olan pensiya yaşının 62-dən 64-ə qaldırılması planını donduraraq, ölkədəki siyasi gərginliyi azaltmaq məqsədi daşıyır. Qeyri-populyar islahatın dayandırılması müxalifət tərəfdən də müəyyən dərəcədə razılıqla qarşılanıb.

Bu qərarın qəbul edilməsi Sebastyen Lekornunun hökuməti ilə Sosialist Partiyası arasındakı siyasi razılaşmanın nəticəsidir. Hökumət, 2023-cü ildə qəbul edilmiş qeyri-populyar pensiya islahatının dayandırılması ilə bağlı düzəlişi parlamentdə səsverməyə çıxarmağa razı oldu. Bu, hökumətin Sosialist Partiyasına verdiyi güzəşt idi. Cavab olaraq, Sosialistlər parlamentdə Lekornu hökumətinə qarşı etimadsızlıq qətnaməsini dəstəkləmədilər. Bu taktiki addım hökumətin mövqeyini qoruyub saxlamasına imkan verib, eyni zamanda Fransa pensiya sistemindəki dəyişiklikləri 2027-ci ilə qədər təxirə salıb.