Fəlsəfə doktoru imtahanı keçirilib

Dövlət İmtahan Mərkəzi (DİM) tərəfindən doktorantura, dissertantura və adyunkturada təhsil alan və ya təhsilini bitirmiş iddiaçıların xarici dillər üzrə fəlsəfə doktoru imtahanı bu gün keçirilib. Bu imtahanlar Bakı və Naxçıvan şəhərlərində təşkil olunub. İmtahanın keçirilməsi üçün DİM ümumilikdə 2 imtahan binası ayırıb. Prosesə nəzarət etmək üçün 3 imtahan rəhbəri, 2 ümumi imtahan rəhbəri, 19 nəzarətçi, həmçinin 3 buraxılış rejimi əməkdaşı (mühafizə) cəlb edilib. Namizədlər imtahan nəticələrini “Danışıq bloku” imtahanı bitdikdən iki həftə sonra öyrənə biləcəklər.

İmtahanın noyabrın 23-də keçirilən əsas hissəsi dörd fərqli blokdan təşkil edilib. Bura dinləyib-anlama, oxuyub-anlama, dildən istifadə (leksik-qrammatik tapşırıqlar) və yazı blokları daxildir. İddiaçılar üçün əsas tələb bu bloklarda iştirak etməkdir; bu imtahanda iştirak etməyənlər danışıq bloku üzrə imtahana buraxılmır. Danışıq bloku üzrə imtahan isə noyabrın 24-də, saat 11:00-da başlayacaq. Hətta ilk 4 blok üzrə 30 bal və daha yüksək nəticə göstərsələr belə, danışıq imtahanında iştirak etməyən iddiaçılar şəhadətnamə ala bilməyəcəklər. Əcnəbi və vətəndaşlığı olmayan iddiaçıların Azərbaycan dili üzrə fəlsəfə doktoru imtahanı və danışıq bloku isə dekabrın 1-də keçiriləcək.

İmtahanda qiymətləndirmə sistemi dəqiqləşdirilmişdir. Xarici dil və əcnəbilər üçün Azərbaycan dili imtahanlarında hər bir düzgün test tapşırığı bir balla qiymətləndirilir; səhv cavablar düzgün cavabların nəticəsinə təsir göstərmir. Yazı və danışıq blokları 10 ballıq şkala üzrə qiymətləndirilir. Beləliklə, imtahanda toplanıla biləcək maksimal bal 50-dir. İmtahanın tələblərini ödəmək üçün iddiaçılar hər bir blok üzrə balların minimum 20 faizini yığmalıdır. Xarici dil üzrə fəlsəfə doktoru imtahanından ümumilikdə ən azı 30 bal toplamış iddiaçılar tələbi ödəmiş hesab edilir. Əcnəbilər üçün Azərbaycan dili üzrə fəlsəfə doktoru imtahanından minimal keçid balı isə 25 təşkil edir.