"Euronews" Qələbənin beşinci ildönümünə həsr olunmuş hərbi paraddan material hazırlayıb - VİDEO

“Euronews” telekanalı Vətən müharibəsində Qələbənin beşinci ildönümünə həsr olunmuş hərbi paraddan bəhs edən material hazırlayıb. Bu tədbir noyabrın 8-də Bakının Azadlıq meydanında baş tutdu. Telekanalın saytında dərc olunan məqalədə bildirilir ki, Azərbaycan İkinci Qarabağ müharibəsinin bitməsindən beş il sonra regionda qələbə və sülh şərəfinə möhtəşəm hərbi parad keçirdi. Prezident İlham Əliyev Zəfər gününü ölkənin mühüm nailiyyəti saydığını dilə gətirdi. O, bu qələbəni həm strateji iqtisadi, həm də hərbi nailiyyətlərlə əlaqələndirir. Prezident eyni zamanda Qarabağda bərpa işlərinin davam etdiyini də qeyd edib. Bu tədbir ölkənin hərbi gücünü və regional mövqeyini nümayiş etdirmək baxımından böyük əhəmiyyət daşıyırd.

Hərbi parad zamanı Azərbaycan Prezidenti Türkiyəli həmkarı Rəcəb Tayyib Ərdoğana və Pakistanın Baş naziri Şahbaz Şərifə münaqişə dövründə göstərdikləri dəstəyə görə təşəkkürünü bildirdi. Materialda qeyd olunur ki, Pakistan hərbçiləri paradda ilk dəfə iştirak ediblər. Prezident İlham Əliyev bu iştirakı şərh edərək vacib bir məqamı vurğuladı. O dedi ki, "Bu, üç ölkənin: Azərbaycan, Türkiyə və Pakistanın xalq - ordu birliyinin təzahürüdür." Bu bəyanat üç qardaş ölkə arasındakı güclü siyasi və hərbi əlaqələri təsdiqləyir və bölgədəki birgə mövqeyi gücləndirir.

Türkiyə Prezidenti Rəcəb Tayyib Ərdoğanın sözləri də telekanalın materialında yer alıb. O, Qarabağdakı qələbənin Asiya və Avropadakı geosiyasi tarazlığı dəyişdirdiyini söyləyib. Ərdoğan bu zəfərin "bölgəmiz üçün yeni bir dövrün qapılarını açdığını" ifadə edib. “Euronews” həmçinin ötən həftə Bakıda Azərbaycan Prezidentinin NATO nümayəndə heyəti ilə görüşünə toxundu. Görüşdə Azərbaycan Silahlı Qüvvələrinin NATO standartlarına uyğunlaşdırılması istiqamətində Türkiyə ilə birgə əməkdaşlıq məsələsi müzakirə edilmişdi. Yazıda son olaraq Azərbaycanın əsas hissəsi ilə Naxçıvanın quru əlaqəsini təmin edəcək dəhlizin əhəmiyyəti də vurğulanır. Bu dəhliz "Beynəlxalq Sülh və firavanlıq üçün Tramp marşrutu" və ya qısaca TRİPP adlandırılacaq.