Ərdoğan Küveyt, Qətər və Omana səfər edəcək

Türkiyə Prezidenti Rəcəb Tayyib Ərdoğan 21-23 oktyabr tarixlərində Körfəz ölkələrinə rəsmi səfər proqramına başlayacaq. O, bu səfərlər çərçivəsində ardıcıl olaraq Küveyt, Qətər və Omana rəsmi səfər edəcək.

Bu məlumatı Türkiyə Prezident Administrasiyasının Kommunikasiya İdarəsinin rəhbəri Burhanettin Duran verib. Səfərlərin əsas məqsədi Türkiyə ilə adı çəkilən dövlətlər arasında mövcud əlaqələri gücləndirməkdir. Türkiyə lideri bu ölkələrlə ikitərəfli münasibətlərin və əməkdaşlığın inkişaf etdirilməsi üçün vacib görüşlər keçirməyi planlaşdırır.

Gündəlikdə ikitərəfli əlaqələrdən başqa, regional və beynəlxalq səviyyədəki əhəmiyyətli hadisələr də yer tutur. Tərəflər bu görüşlər zamanı bir çox məsələ ətrafında fikir mübadiləsi aparacaqlar. Səfərlər çərçivəsində ikitərəfli əlaqələrin möhkəmlənməsinə xidmət edəcək bir sıra sazişlərin imzalanması da nəzərdə tutulub.