"Epşteyn sənədləri"ndə məşhur aktrisanın da adı hallanır

Hollivud ulduzu Ancelina Colinin adı ictimaiyyətə açıqlanan Ceffri Epşteyn sənədlərində hallanır. Amerika Ədliyyə Nazirliyinin saytında yerləşdirilmiş məxfilikdən çıxarılmış sənədlərdə aktrisanın maliyyəçini öz filmlərinin qapalı nümayişlərinə dəvət etdiyi qeyd olunur.

Bu məlumat ABŞ tarixində ən qalmaqallı işlərdən biri hesab olunan "Epşteyn işi" ilə bağlıdır. Sənədlər göstərir ki, Coli elektron poçt vasitəsilə Ceffri Epşteynə iki dəfə müraciət edib. Bu dəvətlər 2014-cü və 2017-ci illərdə baş tutan premyera nümayişlərinə, eləcə də qapalı gecə tədbirlərinə aid idi. Coli məktublarında onu xüsusi tədbirlərə çağırmışdı.

Məhkəmə sənədləri arasında yer alan yazışmalarda maliyyəçinin cavabı da var. O, hər iki halda aktrisaya təşəkkürünü bildirib və tədbirlərdə iştirak etməyə söz verib. Bu hadisə sadəcə bir neçə dəvətdən ibarət olsa da, adı cinsi istismar qalmaqalında hallanan bir şəxslə Hollivud ulduzunun əlaqəsini ortaya qoyur. Yazışmalar məxfilikdən çıxarılmış sənədlər arasında ictimaiyyətə təqdim edilib.

Epşteyn işi 2000-ci illərin əvvəllərində başlayıb. Maliyyəçi Manhettendəki evində və şəxsi adasında onlarla yetkinlik yaşına çatmayan qızın cinsi istismara məruz qaldığı "şənliklərin" təşkilatçılığında ittiham edilirdi. Siyasət və şou-biznes sahəsindən olan bir çox məşhurlar onun qonaqları arasında yer alırdı. Ceffri Epşteyn 2019-cu ildə həbs edildi. Onu 40 ilə qədər həbs cəzası gözləyirdi, lakin maliyyəçi hakim qarşısına çıxmadan Manhetten həbsxanasındakı kamerasında ölü tapıldı. Bu dəhşətli işlə bağlı aktrisanın adı illər sonra açılan sənədlərdə ortaya çıxıb.