Əmək müqavilələrinin sayı açıqlanıb

Həyata keçirilən vergi siyasəti Azərbaycanda əmək bazarına müsbət təsir göstərməyə davam edir. İqtisadiyyat Nazirliyi yanında Dövlət Vergi Xidmətindən verilən məlumata görə, 2025-ci il noyabr ayının 1-nə olan vəziyyətə görə, işçilərlə işəgötürənlər arasında bağlanmış əmək müqavilələrinin ümumi sayı 1.884.656-ya çatıb.

Bu rəqəmlər məşğulluqdakı artım sürətini aydın göstərir. Təkcə oktyabr ayı ərzində bu sayda 16,1 min artım qeydə alınıb. Bu artımla yanaşı, ümumi əmək müqavilələrinin əhəmiyyətli hissəsi qeyri-neft sektorunun özəl bölməsinin payına düşür. Bildirilib ki, bütün müqavilələrin təxminən 54,2%-ə yaxını məhz bu sahədə bağlanıb.

Qeyri-neft sektorundakı bu yüksəlişin əsas hissəsi xidmət, ticarət və tikinti sahələrində qeydə alınıb. Bu sahələrdə işçi qüvvəsinə olan tələbatın artması müşahidə edilir. Deməli, həyata keçirilən vergi siyasəti iş yerlərinin leqallaşmasına və ölkədə məşğulluğun davamlı artmasına şərait yaradır.