Əli Xameneinin müşaviri: İran iki həftə ərzində nüvə silahı yarada bilər

İranın ali dini lideri Ayətullah Əli Xameneinin müşaviri Cavad Laricani ölkəsinin nüvə silahı yaratma potensialı haqqında diqqətçəkən bir bəyanat verib. Laricani qeyd edib ki, İran cəmi iki həftə ərzində nüvə silahı istehsal edə bilər. Lakin o, vurğulayıb ki, Ayətullah Əli Xameneinin verdiyi fətva bu cür silahların yaradılmasını qadağan edir və bu qadağa qüvvədə qalır. Müşavir bu məlumatı İranın "Khabar Fouri" nəşrinə verdiyi açıqlamada səsləndirib.

Cavad Laricaninin sözlərinə görə, müdafiə qabiliyyətinin və texnoloji imkanların genişləndirilməsi Tehran üçün strateji prioritet olaraq qalır. O, əlavə edib ki, Ayətullahın nüvə silahı qadağası haqqında fətvası şiə qanunvericiliyində uzun bir tarixə malikdir və çox əsaslıdır. Laricani ölkənin texniki gücünə baxmayaraq, dini prinsiplərə sadiq qaldığını söyləyib. Müşavir bildirib ki, ölkə atom bombası əldə etməyə iki həftədən az müddətdə qadirdir, amma biz dinimizə sadiqik.

Müşavir ehtimal olunan müharibə ssenarilərinə də toxunub. O, müharibə başlayacağı təqdirdə bunun barbarlıqla olmayacağını və hər iki tərəfin müəyyən sərhədlərinin olacağını bildirib. Bu bəyanat İranın hərbi qabiliyyəti haqqında beynəlxalq ictimaiyyətdə yaranan müzakirələrə yenidən təkan verir. Laricani beləliklə, İranın yüksək hərbi hazırlığa malik olduğunu, lakin dini rəhbərliyin qadağası səbəbindən bu imkandan istifadə etmədiyini göstərir.