Əddis-Əbəbədə Azərbaycan-Efiopiya biznes forumu keçiriləcək

Azərbaycandan olan iş adamları bu ilin 23-29 noyabr tarixlərində Efiopiyanın paytaxtı Əddis-Əbəbəyə biznes missiyası ilə səfər etməyi planlaşdırırlar. Afrika-Azərbaycan Əməkdaşlıq Təşkilatının (AFAZ) məlumatına görə, bu səfər iki ölkə arasında iqtisadi əməkdaşlığın gücləndirilməsi məqsədini daşıyır. Missiya çərçivəsində geniş proqram təşkil olunacaq. Əsas hadisə Azərbaycan-Efiopiya biznes forumunun keçirilməsidir. Eyni zamanda, yeni tərəfdaşlıq əlaqələrinin yaradılması və Azərbaycan biznesinin Afrika bazarına çıxış imkanlarının genişləndirilməsi yolları müzakirə ediləcək.

Səfər zamanı çoxsaylı işgüzar görüşlər nəzərdə tutulub. Proqrama B2B (biznesdən biznesə) və B2G (biznesdən hökumətə) formatlarında danışıqlar daxildir. İş adamları həmçinin Efiopiyadakı sənaye parklarının və istehsal müəssisələrinin fəaliyyəti ilə yerində tanış olacaqlar. Planlaşdırılan görüşlər arasında "MÜSİAD Ethiopia", yerli dövlət qurumları, ticarət palatası və digər ticarət assosiasiyaları ilə danışıqlar da var. Azərbaycanın "ASAN Xidmət"inin analoqu sayılan MESOB mərkəzində də mühüm görüşlər keçiriləcək. Bu görüşlər birbaşa əlaqələrin qurulmasına və təcrübə mübadiləsinə imkan yaradacaq.

Qeyd edək ki, Azərbaycan və Efiopiya əlaqələri ötən ildən aktiv şəkildə inkişaf edir. Ötən ilin noyabr ayında Azərbaycanın İqtisadiyyat naziri Mikayıl Cabbarov Efiopiyanın dövlət naziri Aklilu Tadessenin rəhbərlik etdiyi nümayəndə heyəti ilə görüşmüşdü. Həmin görüşdə tərəflər iqtisadi əməkdaşlıq potensialının reallaşdırılmasına böyük əhəmiyyət verdiklərini vurğuladılar. Onlar ticarət, investisiya və "yaşıl enerji" sahələrindəki tərəfdaşlıq imkanlarını nəzərdən keçirdilər. Tərəflər həmçinin, Azərbaycanın sənaye parkları sahəsindəki təcrübəsindən istifadə etmək, işgüzar dairələr arasında əməkdaşlığı artırmaq və hüquq-müqavilə bazasını genişləndirmək məsələlərini müzakirə ediblər.