Əcnəbi solistlər xalq mahnılarımızı ifa ediblər (FOTO)

Almaniyanın Bad Pyrmont şəhərində Azərbaycanın 44 günlük Vətən müharibəsində qazandığı şanlı Zəfərin beşilliyi münasibətilə mühüm konsert təşkil edildi. Bu tədbir Azərbaycan Respublikasının Diasporla İş üzrə Dövlət Komitəsinin tabeliyindəki Azərbaycan Diasporuna Dəstək Fondunun və Almaniya Mədəniyyət Nazirliyinin dəstəyi ilə baş tutdu.

Konsertdə bəstəkar Xədicə Zeynalova çıxış etdi. O, ölkəmizin zəngin mədəni irsi, musiqi ənənələri və xalqımızın qürurlu Zəfəri haqqında geniş məlumat verdi. Proqramda Xədicə Zeynalovanın yaratdığı "Bridge of Sound" adlı beynəlmiləl ansambl səhnəyə çıxdı. Bu qrup müxtəlif ölkələrdən gələn musiqiçi və solistlərdən təşkil edilmişdi.

Ansamblın üzvləri arasında Alexey Moos (skripka və konsertmeyster), Vsevolod Khuotarinen (akkordeon ifaçısı), Maciej Włodarski (violonçel) və Xədicə Zeynalova (orqan ifaçısı) var idi. Vokal solistlər, soprano İrina Trutneva, mezzo-soprano Marina Paşinskaya və tenor Peng Tian da çıxış etdilər. Xarici solistlərin ifasında Azərbaycan xalq mahnıları olan "Ay Laçın", "Qaladan qalaya" və "Ay Dilbər" bəstəkarın yeni aranjemanında səsləndirildi. Bu ifalar sürəkli alqışlara səbəb oldu. Xədicə Zeynalovanın yeni monumental "Ave Maria" əsərinin səsləndirilməsi isə tamaşaçılar tərəfindən böyük maraqla qarşılandı.

Konsert bitəndə izləyicilər öz fikirlərini dilə gətirdilər. Onlar Azərbaycan musiqisini daha yaxından tanımaq istədiklərini və xalq mahnılarının Almaniyanın digər şəhərlərində də ifa olunmasını arzuladıqlarını bildirdilər.