Dünyanın ən hündür kilsə qülləsi açıqlanıb

Barselonada yerləşən Saqrada Familia kilsəsinin mərkəzi qülləsi dünyanın ən hündür kilsə qülləsi adını qazandı. Bu, Ulmdəki məşhur Münster kilsəsinin qülləsini geridə qoyması deməkdir. Yeni rekord kilsədə tikintinin son mərhələsində mərkəzi qülləyə xaçın ilk hissəsinin quraşdırılması ilə qeydə alındı. Tikinti işləri 2026-cı ildə başa çatanda bazilikanın ümumi hündürlüyü 172,5 metr olacaq.

İsa Məsihə həsr olunmuş mərkəzi qüllənin hündürlüyü xaç hissəsinin aşağı hissəsinin əlavə edilməsi ilə 162,91 metrə çatdı. Bu nəticə ilə Saqrada Familia Ulm Münsterini geridə qoyub. Ulm Münster kilsə qülləsinin hündürlüyü isə 161,53 metrdir; onun inşası 1890-cı ildə tamamlanmışdı. Qeyd edək ki, çəkisi 24 ton, uzunluğu 7,25 metr olan xaçın konstruksiyası Bavariyada hazırlanıb. Tamamlandıqdan sonra xaçın hündürlüyü 17, eni isə 13,5 metr olacaq.

Saqrada Familia, əfsanəvi memar Antoni Qaudinin özünəməxsus yaradıcılığını əks etdirir. Kilsənin rəsmi açılışı gələn il iyunun 10-da – Qaudinin ölümünün 100-cü ildönümündə baş tutacaq. Əsas konstruksiyanın 2026-cı ildə bitməsi planlaşdırılsa da, kilsənin tikintisinin tam başa çatması 2030-cu illərdə nəzərdə tutulur.