DTX rəisi: Bəzi destruktiv dairələr Zəngəzur dəhlizinin reallaşdırılmasına hər vəchlə maneçilik törətməyə çalışır

Dövlət Təhlükəsizliyi Xidmətinin (DTX) rəisi general-polkovnik Əli Nağıyev bildirib ki, bəzi destruktiv dairələr Zəngəzur dəhlizinin həyata keçirilməsinə hər vəchlə mane olmağa çalışır. Bu dəhliz Uzaq Şərqdən Avropaya qədər uzanan Orta Dəhlizin vacib tərkib hissəsidir. General-polkovnik Əli Nağıyev bu açıqlamanı Türk dövlətlərinin təhlükəsizlik orqanlarının Xankəndi şəhərində keçirilən iclasında verib.

Əli Nağıyev çıxışında beynəlxalq nəqliyyat və kommunikasiya xətlərinin təhlükəsiz işinin təmin edilməsində xüsusi xidmət orqanlarının rolundan geniş danışıb. Bu xidmətlər həmin xətləri beynəlxalq terrorçuluq, transmilli mütəşəkkil cinayətkarlıq, qaçaqmalçılıq və digər mənfi hallardan qorumalıdır. DTX rəisi vurğulayıb ki, Zəngəzur dəhlizinin reallaşdırılmasına edilən bu maneçilik cəhdləri, göstərilən istiqamətdə təhlükəsizliyin etibarlı təmin olunmasını ölkə qarşısında duran mühüm vəzifələrdən biri kimi qoyur.