Daşkənddə Beynəlxalq Nəqliyyat Forumu keçirilir

Özbəkistanın paytaxtı Daşkənddə əhəmiyyətli bir tədbirə - Beynəlxalq Nəqliyyat Forumuna ("International Transport Forum") start verilib. Forumla yanaşı, aviasiya forumu və "TransLogistica Uzbekistan 2025" sərgisinin də açılışı olub.

Bu böyük tədbirlər seriyası Özbəkistan Nəqliyyat Nazirliyi, Türk Dövlətləri Təşkilatı, Logistika Mərkəzləri və Yük Daşıyıcıları Alyansının təşkilatçılığı ilə həyata keçirilir. Forum konstruktiv müzakirələrə, məlumat mübadiləsinə və birgə təşəbbüslərə dəstək verməyi hədəfləyir. Onun əsas məqsədi multimodal nəqliyyat marşrutlarının inkişafını təmin etməkdir.

Özbəkistan nəqliyyat naziri İlhom Mahkamov çıxış edərək, bu tədbirin dövlət və beynəlxalq təşkilatların, işgüzar dairələrinin və aparıcı ekspertlərin nümayəndələrini bir araya gətirdiyini vurğulayıb. Müzakirələr nəqliyyat-logistika sisteminin inkişafı, regional əlaqələrin möhkəmləndirilməsi və beynəlxalq tərəfdaşlığın genişləndirilməsi üzrə aktual məsələləri əhatə edir. Bu, nəqliyyat sektorundakı ən vacib problemləri həll etməyə imkan verir.

Forum çərçivəsində həmçinin Asiya ölkələri üçün 4-cü Yüksək Səviyyəli Dialoq keçirilir. Bu dialoqda Özbəkistan, Qırğızıstan, Tacikistan, Pakistan, Azərbaycan, Qazaxıstan və Türkiyənin nazirlikləri və qurumlarının təmsilçiləri iştirak edirlər. Beynəlxalq təşkilatların nümayəndələri də bu danışıqlara qatılıb. Bu görüş regional əlaqələrin və nəqliyyat-logistika sisteminin genişlənməsi üçün mühüm bir platformadır.