Ceyhun Bayramov: Sülhməramlıların statusu ilə bağlı Azərbaycanın təklif etdiyi anlayışlar Rusiya tərəfini qane etmədi

Xarici işlər naziri Ceyhun Bayramov Rusiya sülhməramlılarının 2020-ci ildən 2024-cü ilə qədər olan fəaliyyəti barədə mühüm detalları açıqlayıb. Nazir ITV-yə müsahibəsində deyib ki, 2020-ci ilin dekabrında Azərbaycan və Rusiya tərəfləri arasında sülhməramlıların statusu ilə bağlı intensiv danışıqlar aparılıb. Bu danışıqlar bir neçə mərhələdə həyata keçirildi. Azərbaycanın əsas məqsədi hazırlanmış sənədə elə elementlərin daxil edilməsi idi ki, bu, onların bütün fəaliyyətini yalnız Azərbaycan ərazisində və Bakının icazəsi ilə həyata keçirməyə zəmanət versin.

Azərbaycan tərəfi müzakirə olunan sənədə bir sıra şərtləri daxil etmişdi. Nazir qeyd edib ki, bu şərtlər birmənalı şəkildə sülhməramlıların hər bir prosesi Azərbaycanla razılaşdırılmasını və ölkənin icazəsi ilə etməsini nəzərdə tuturdu. Azərbaycan, prinsip etibarilə, bu elementləri ehtiva edən sənədə baxa biləcəyini düşünürdü. Lakin, ölkəmizin irəli sürdüyü anlayışların bir çoxu Rusiya tərəfini qane etmədi. Moskva ilə Bakı arasındakı fikir ayrılıqları danışıqların uzun sürməsinə səbəb oldu, çünki Azərbaycan öz ərazisində suveren nəzarət tələb edirdi.

Uzun çəkən müzakirələrdən sonra hər iki tərəf ortaq məxrəcə gəlməyin mümkün olmayacağını anladı. Bu səbəbdən, Rusiya sülhməramlıları 2024-cü ilə qədər, yəni ərazini tərk edənə qədər heç bir rəsmi hüquqi statusa malik olmadılar. Bu vəziyyət 2020-ci ildə Azərbaycanın təklif etdiyi əsas şərtlərin qəbul edilməməsi ilə birbaşa əlaqəli idi. Bu cür danışıqların uğursuzluğu sülhməramlı missiyanın status məsələsinin dörd il ərzində həll edilməmiş qalmasına gətirib çıxardı.