Bu quruma tətbiq edilən vergidən azadolmaların müddəti artırılır

Milli Məclisin plenar iclasında Vergi Məcəlləsinə edilən dəyişikliklər qəbul edilib. Bu qanun layihəsi mənfəət, əmlak və torpaq vergisindən azadolmalar və güzəştlər siyahısının genişləndirilməsini nəzərdə tutur.

Layihəyə əsasən, müvafiq icra hakimiyyəti orqanının müəyyən etdiyi qurumun yaratdığı sənaye parkında fəaliyyət göstərən rezidentlərə tətbiq edilən əsas vergi azadolmalarının müddəti uzadılır. Sənaye parkının rezidentinin həmin fəaliyyətdən əldə etdiyi mənfəət 2025-ci il yanvarın 1-dən 6 il müddətinə mənfəət vergidən azad ediləcək. Bu addım rezidentlərin uzunmüddətli inkişafına dəstək verir.

Eyni zamanda, bu rezidentlər sənaye parkındakı fəaliyyət prosesində istifadə etdikləri əmlaka və torpaqlara görə vergi ödəməkdən də azad olacaqlar. Sənaye parkının rezidenti əmlak və torpaq vergisini ödəməkdən azad ediləcək müddət də 2025-ci il yanvarın 1-dən başlayaraq 6 il davam edəcək. Bu dəyişikliklər sənaye parkı daxilindəki investisiya və istehsal fəaliyyətini stimullaşdırmağı hədəfləyir.

Bundan əlavə, "Gömrük tarifi haqqında" Qanuna da dəyişiklik təklif olunub. Bu dəyişiklik sənaye parkının rezidenti tərəfindən həmin fəaliyyətin məqsədləri üçün idxal edilən bütün növ malların gömrük rüsumlarından azad edilməsi müddətini uzadır. Təsdiqedici sənəd əsasında idxal edilən bu mallar 2030-cu ilədək gömrük rüsumlarından azad ediləcək.

Layihəyə görə, bu müddətin uzadılması zərurəti əsasən Bakı Gəmiqayırma Zavodu ilə bağlı yaranıb. Zavodun sifarişçilərə təqdim etdiyi və hazırda inşası davam edən tikinti layihələri üzrə qiymətlər mövcud vergi güzəştləri əsasında hesablanmışdı. Qaradağ Sənaye Parkının gəmiqayırma fəaliyyəti ilə məşğul olan rezidenti kimi Zavoda verilən vergi azadolmalarının müddəti başa çatmaq üzrə olduğu üçün, bu müddət 2030-cu ilin 31 dekabr tarixinədək uzadılır. Bu qanun layihəsi Milli Məclisdə səsverməyə qoyularaq üçüncü oxunuşda qəbul edildi.