Bu ilin doqquz ayında Vətən müharibəsi iştirakçılarına 206 mindən çox tibbi xidmət göstərilib

Vətən müharibəsində iştirak etmiş şəxslərə göstərilən tibbi xidmətlərin həcmi bu ilin ilk doqquz ayında geniş olub. TƏBİB şəhid ailələrinin üzvləri və müharibə iştirakçılarının sağlamlığını daim diqqət mərkəzində saxlayır. Müvafiq dövlət qurumları ilə əlaqəli şəkildə, şəhidlərin birinci dərəcəli qohumlarının tibbi xidmətlərdən vaxtında yararlanması, müayinə və müalicə işlərinin təşkili istiqamətində görülən işlər davam edir.

Nəticədə, 2025-ci ilin yanvar-sentyabr ayları ərzində tibb müəssisələrinə ümumilikdə 10 805 müharibə iştirakçısı 68 373 tibbi xidmət üçün müraciət edib. Bu müraciətlər əsasında onlara 206 614 fərqli tibbi xidmət göstərilib. Göstərilən tibbi xidmətlər, əsasən, terapevtik, kardioloji, endokrinoloji, nevroloji, laborator-diaqnostik, eləcə də radioloji kimi müxtəlif istiqamətləri əhatə edib. Müharibə iştirakçılarının müayinə və müalicə işinin vaxtında təşkili bu xidmətlərin əsas məqsədidir.

Şəhid ailələri üzvlərinə də oxşar miqyasda tibbi dəstək göstərilib. 2025-ci ilin yanvar-sentyabr ayları ərzində tibb müəssisələrinə cəmi 7 043 şəhid ailəsi üzvü müraciət edib. Ümumilikdə 38 837 tibbi xidmət üçün edilən bu müraciətlər əsasında şəhid ailəsi üzvlərinə 142 122 fərqli tibbi xidmət göstərilib. Həm bu həssas əhali qrupundan, həm də müharibə iştirakçılarından TƏBİB-in "815" və İcbari Tibbi Sığorta üzrə Dövlət Agentliyinin "1542" Çağrı Mərkəzindən daxil olan 1212 müraciət araşdırılaraq cavablandırılıb.

Hazırda TƏBİB-in tabeliyindəki tibb müəssisələrində şəhid ailələri və müharibə iştirakçıları ilə iş üzrə 161 nəfər koordinator çalışır. Koordinatorların əsas vəzifəsi müraciət edən şəxslərin növbəsiz qeydiyyata alınması və ixtisaslı həkim müayinəsinin aparılmasına yardım etməkdir. Onlar həmçinin həkim təyinatı əsasında instrumental və laborator müayinələrdən növbəsiz keçirilməsini təmin edirlər. Əgər tələb olunan tibbi xidmət dövlət tibb müəssisələrində yoxdursa, koordinatorlar icbari tibbi sığorta üzrə Xidmətlər Zərfi çərçivəsində müqaviləli özəl tibb müəssisələrinə göndərişlə təmin olunmasına dəstək göstərirlər. Əlavə olaraq, koordinatorlar şəhid ailələri və əlilliyi olan müharibə iştirakçılarının dərman təminatının aparılması üçün "YAŞAT" fonduna təqdim ediləcək sənədlərin hazırlanmasına yardım edirlər. Onlar mütəmadi olaraq zənglər edərək tibbi xidmətə ehtiyacı olanların müayinə və müalicə prosedurlarına vaxtında cəlb olunmasını təmin edirlər.