Bu il “Hənifə Məlikova-Zərdabi adına təqaüd proqramı”nı qazanan tələbələrin sayı açıqlanıb

Təhsil İnkişaf Fondunun (TIF) İdarə Heyəti sədrinin vəzifələrini müvəqqəti icra edən İlqar Bayramlı bu gün jurnalistlərə “Hənifə Məlikova-Zərdabi adına təqaüd proqramı” haqqında məlumat verib. Proqram 2022-ci ildən etibarən həyata keçirilir. Cari tədris ili üzrə proqram çərçivəsində 93 tələbə qız təqaüd dəstəyi almaq imkanı qazanıb. Ümumilikdə, layihənin icrası dövründə 300-ə yaxın tələbə bu proqramda iştirak edib.

İ.Bayramlı gələcək fəaliyyətlə bağlı açıqlama verərkən Təhsil İnkişaf Fondunun tərəfdaş qurumlarla birgə işləri davam etdirəcəyini deyib. O bildirib: “Təhsil İnkişaf Fondu olaraq, biz tərəfdaş qurumlarla birgə fəaliyyətimizi davam etdirəcəyik, gənclərin elmi potensialının inkişafına, tədqiqat imkanlarının genişlənməsinə töhfə verməkdə israrlıyıq”.

Bayramlı həmçinin digər əlavə təqaüd proqramlarından da danışıb. Bu layihələr çərçivəsində gənc qızların təhsilinə dəstək verilir. Bu tədqiqat proqramlarına 3 mindən çox müraciət daxil olub. Nəticədə 400-dən artıq tələbə qız həmin proqramlarda iştirak edib. Fond bu cür layihələrlə Hənifə Məlikova-Zərdabi adına təqaüd proqramının fəaliyyətini tamamlayır.