bp Bakı–Supsa və Bakı–Tbilisi–Ceyhan kəmərlərinin operatorluğunun təhvili barədə açıqlama verib

bp şirkəti Bakı-Supsa (WREP) və Bakı-Tbilisi-Ceyhan (BTC) neft kəmərlərinin operatorluğunun müvafiq dövlət orqanlarına təhvil verilməsi üçün lazım olan hazırlıq tədbirlərinin vaxtında planlaşdırılması məqsədilə müzakirələr apardığını bildirib. Şirkətin yaydığı məlumata görə, boru kəmərlərinin idarə edilməsi haqqında müvafiq sazişlər mövcuddur. Bu sazişlər neft və qaz ixracı kəmərlərinin operatorluğunun əvvəldən razılaşdırılmış müddətlərdə hökumət və ya hökumət qurumlarına təhvil verilməsini əvvəlcədən nəzərdə tutur. Bu təhvil prosesi müqavilə şərtlərinə əsasən həyata keçirilir.

Həmin sazişlərə əsasən, 2021-ci ildə Cənubi Qafqaz Boru Kəmərinin operatorluğu həm Azərbaycanda, həm də Gürcüstanda SOCAR-a təhvil verilmişdi. Bakı-Supsa (Qərb İxrac Boru Kəməri) və Bakı-Tbilisi-Ceyhan (BTC) boru kəmərlərinin operatorluğunun da eyni qaydada, razılaşdırılmış müddətdə Azərbaycan, Gürcüstan və Türkiyədəki müvafiq qurumlara təhvil verilməsi planlaşdırılır. Hazırda şirkət bu işlərin vaxtında planlaşdırılması üçün müvafiq qurumlarla danışıqları davam etdirir. BTC kəməri 2006-cı ildən işləyir və indiki operatatoru bp şirkətidir.

BTC və Bakı-Supsa kəmərləri regional enerji təchizatı üçün böyük əhəmiyyət daşıyır. Bakı-Supsa kəməri nefti Xəzər dənizindən Gürcüstanın Supsa terminalına çatdırır. BTC kəmərinə gəlincə, o, Azəri-Çıraq-Günəşli (AÇG) yatağından neft və “Şah Dəniz” yatağından kondensatı Azərbaycan, Gürcüstan və Türkiyə ərazilərindən keçirərək Türkiyənin Ceyhan terminalına nəql edir. BTC kəmərinin səhmdarları arasında bp (30.10%) və SOCAR (32.97%) ən böyük paya malikdirlər. Konsorsiumda həmçinin MOL (8.90%), TPAO (6.53%), Eni (5.00%), TotalEnergies (5.00%), ITOCHU (3.40%), ONGC Videsh (3.10%), ExxonMobil (2.50%) və INPEX (2.50%) kimi fərqli şirkətlər yer alır.