Bəxtiyar Aslanbəyli: "Təhsilə yatırılan investisiya ən yüksək geri dönüş gətirir"

BP şirkətinin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli təhsilə yatırılan investisiyanın hər zaman ən yüksək geri dönüş gətirdiyini bildirib. O, bu bəyanatı BP və tərəfdaşlarının ingilis dili üzrə "Məktəblilər üçün yeni rəqəmsal ingilis dili öyrənmə mənbəyi" layihəsinin təqdimatında səsləndirib. Aslanbəylinin sözlərinə görə, BP-nin sosial layihələrində təhsili prioritet seçməsi məqsədyönlü bir yanaşmanın nəticəsidir. Təhsil sahəsinə yönələn investisiyanın geri dönüşü digər sahələrlə müqayisədə daha böyükdür. Buna görə də, şirkət layihələri Elm və Təhsil Nazirliyinin dəstəyi və istiqaməti ilə həyata keçirir.

Cənab Aslanbəyli Nazirliyin pandemiya dövründə başladığı Rəqəmsal Məktəb layihəsinin bu gün də aktiv şəkildə istifadə edildiyini qeyd edib. Mövcud resurslar şagirdlər və müəllimlər üçün tam əlçatan olaraq qalır. Tərəfdaşlarla aparılan müzakirələrdən sonra yeni formatda ingilis dili dərs vəsaitlərinin hazırlanması qərarı qəbul edilib. Bu layihə Landau məktəbinin təklifi əsasında formalaşıb. Hazırlanan resurs müəllimin təqdimatı, slaydlar və tapşırıqların həlli ilə bağlı görüntünün eyni anda ekranda göstərildiyi üçlü formatı özündə birləşdirir. Özəl məktəb keyfiyyətində hazırlanan bu material ölkənin bütün şagirdləri, müəllimləri və valideynləri üçün əlçatan olacaq.

Resurs şagirdlərə məktəbdə keçirilən dərsləri daha yaxşı mənimsəməyə kömək edir. Artıq 5-9-cu siniflər üçün riyaziyyat məzmunu istifadəyə verilib. Bundan başqa, 5-11-ci siniflər üçün ingilis dili materialları tam hazırdır və platformalara yerləşdirilir. Müxtəlif bölgələrdə çalışan müəllimlər bu resurs vasitəsilə həmkarlarının dərs keçmə üsullarından öyrənmək imkanı əldə edirlər. Hətta valideynlər də övladlarına dəstək olmaq üçün dərsləri əvvəlcədən izləyə və hazırlıq görə bilərlər. Layihədə iştirak edən müəllimlərin seçimi yalnız Landau məktəbinin heyəti ilə məhdudlaşmayıb. Açıq müraciət formatı elan edilmiş, könüllü müraciət edən müəllimlər arasından ekspert seçimləri aparılıb. Onların zəhməti nəticəsində bu materiallar ortaya çıxıb, cəmiyyətin təhsil səviyyəsinə böyük töhfə verir.