Benində hərbçilər prezident iqamətgahına hücum ediblər, ordu nəzarətin bərpasına çalışır – YENİLƏNİB

Benin ərazisində üsyançı hərbçilər ölkə prezidentinin iqamətgahını ələ keçirməyə cəhd ediblər. Bu hadisələr fonunda hərbçilər milli televiziyanın efirində Prezident Patris Talonun vəzifədən uzaqlaşdırıldığını və bütün dövlət qurumlarının buraxıldığını elan etdilər. "La Nouvell Tribune" portalının Benin Dövlət Yayım Korporasiyası (SRTB) efirində yayımlanan bəyanata istinadən verdiyi məlumata görə, hərbi qrup hakimiyyəti ələ keçirdiyini iddia edir.

Hərbçilər keçid dövründə ölkəyə nəzarətin polkovnik-leytenant Tiqri Paskalın rəhbərlik etdiyi Hərbi Bərpa Komitəsinə veriləcəyini bəyan etdilər. Buna baxmayaraq, rəsmi mənbələr çevriliş cəhdinin uğursuz olduğunu söyləyirlər. AFP agentliyi xəbər verir ki, Prezident Patris Talon çevriliş cəhdi zamanı təhlükəsiz yerdə olub, ordu isə ölkədəki nəzarəti bərpa etməyə çalışır.

Beninin xarici işlər naziri "Reuters" agentliyinə açıqlamasında qiyamın kiçik bir hərbçi qrupu tərəfindən edildiyini bildirdi. O, ordunun böyük hissəsinin hələ də qanuni hakimiyyətə sadiq qaldığını vurğuladı. Üsyançılar dövlət televiziyasına nəzarəti ələ keçirsələr də, bu, yalnız bir neçə dəqiqəlik siqnalın kəsilməsi ilə nəticələndi. Bu, üsyançıların geniş dəstəyə malik olmadığını göstərir.