BƏƏ Prezidenti Fərid Əhmədovu qəbul edib

Birləşmiş Ərəb Əmirliklərinin (BƏƏ) Prezidenti Şeyx Məhəmməd bin Zayed Al Nəhyan Azərbaycanın ədliyyə naziri Fərid Əhmədovu qəbul edib. Ədliyyə Nazirliyindən verilən məlumata görə, bu görüş Əbu-Dabidə baş tutub.

Qəbul zamanı Fərid Əhmədov ilk növbədə Azərbaycan Prezidenti İlham Əliyevin salamlarını BƏƏ dövlət başçısına çatdırıb. Şeyx Məhəmməd bin Zayed Al Nəhyan da buna cavab olaraq, öz salamlarını və dərin ehtiramını Azərbaycan dövlət başçısına çatdırmağı xahiş etdi.

Görüşdə Azərbaycan və BƏƏ prezidentlərinin təşəbbüslərindən danışılıb. Bu təşəbbüslər sayəsində iki ölkə arasında münasibətlər bütün istiqamətlər üzrə strateji tərəfdaşlıq səviyyəsinə çatıb. Ölkə başçılarının əldə etdiyi razılıqlar əsasında iki ölkənin ədliyyə nazirlikləri arasında əməkdaşlıq həyata keçirilir. Bu əməkdaşlıq mülki və ticarət işləri, eləcə də cinayət işləri üzrə qarşılıqlı hüquqi yardım və ekstradisiya haqqında imzalanmış müqavilələri əhatə edir.

Qeyd edilib ki, ədliyyə sahəsində sıx əməkdaşlıq ölkələr arasında əlaqələrin daha da genişlənməsinə töhfə verir. Söhbət zamanı həm də hüquqi, eləcə də ədliyyə sahəsində əməkdaşlığın daha da inkişaf etdirilməsi üçün yeni imkanların olduğu vurğulanıb.