BƏƏ ilə ticarət və investisiya əlaqələrini genişləndirmək məqsədilə Birgə İşgüzar Şuranın yaradılmasını planlaşdırırıq - Mikayıl Cabbarov

İqtisadiyyat naziri Mikayıl Cabbarov Bakıda BƏƏ-nin Müstəqillik Günü münasibətilə keçirilən tədbirdə çıxış edib. O, Azərbaycan və Birləşmiş Ərəb Əmirlikləri (BƏƏ) arasındakı əlaqələrin yeni mərhələyə qaldırıldığını bildirib. Nazir qeyd etdi ki, bu ilin sentyabrında Əlahəzrət Şeyx Məhəmməd bin Zayed Əl Nəhyanın Qarabağa tarixi səfəri iki ölkə arasındakı dostluğu, həmrəyliyi və strateji tərəfdaşlığı aydın göstərdi. Səfər zamanı əməkdaşlığı gücləndirən mühüm sənədlər imzalandı. Bu sənədlər arasında Azərbaycan ilə BƏƏ arasında hərtərəfli strateji tərəfdaşlıq münasibətləri haqqında Birgə Bəyannamə xüsusi əhəmiyyət daşıyır. Mikayıl Cabbarov iki ölkə arasında bütün sahələrdə, o cümlədən iqtisadi-ticari sahədə əməkdaşlığın uğurla davam etdiyini və hər iki tərəfin bu münasibətləri inkişaf etdirmək niyyətində olduğunu vurğuladı.

Nazir xüsusilə investisiya sahəsindəki əməkdaşlığın əhəmiyyətini qeyd etdi. O bildirdi ki, 1 milyard ABŞ dolları maliyyə imkanlarına malik Birgə İnvestisiya Fondu bu əməkdaşlıqda əsas alətlərdən biridir. Hazırda bu Fond çərçivəsində bir sıra investisiya layihələri üzrə danışıqlar aparılır. Bundan başqa, bu ilin sentyabr ayında Bakıda keçirilən Birinci Azərbaycan Beynəlxalq İnvestisiya Forumu zamanı mühüm bir saziş imzalandı. Həmin saziş "Modon Holding" ilə şəhərsalma üzrə 5 milyard dollarlıq investisiya layihəsi üzrə əməkdaşlığı nəzərdə tutur. Neft və qaz sektorunda tərəfdaşlıq SOCAR və ADNOC arasında səmərəli əməkdaşlıq sayəsində inkişaf etməyə davam edir.

BƏƏ-dən olan şirkətlər Azərbaycanda bərpaolunan enerji layihələrində strateji tərəfdaş və əsas investor kimi çıxış edirlər. Ölkəmizdə istifadəyə verilən ilk Günəş elektrik stansiyasının tikintisi Birləşmiş Ərəb Əmirliklərinin dəstəyi ilə həyata keçirilib. Eyni zamanda, yeni layihələrə əməkdaşlıq marağının artdığı müşahidə edilir. Ticarət və investisiya əlaqələrini genişləndirmək üçün iki ölkə Birgə İşgüzar Şuranın yaradılmasını planlaşdırır. Mikayıl Cabbarov əlavə etdi ki, bu yeni institusional mexanizm biznes icmaları arasındakı əməkdaşlığı daha yüksək səviyyəyə qaldırmağa kömək edəcək.