BƏƏ ilə Azərbaycan arasında ümumi ticarət həcmi təxminən 2 milyard 200 milyon ABŞ dolları təşkil edib - Səfir

Birləşmiş Ərəb Əmirlikləri (BƏƏ) və Azərbaycan Respublikası 1992-ci ildə qurulan ikitərəfli əlaqələrində böyük inkişaf yolu keçib. Bu irəliləyiş iki dost ölkənin rəhbərləri arasında yaranmış yüksək səviyyəli münasibətlərin nəticəsidir. BƏƏ-nin Azərbaycandakı səfiri Məhəmməd Əl Bluşinin sözlərinə görə, ölkələr arasında çoxlu sayda yüksək səviyyəli qarşılıqlı səfərlər baş tutub. Xüsusilə, Prezident, Əlahəzrət Şeyx Məhəmməd bin Zayed Əl Nəhyanın sentyabrın 16-da Azərbaycana etdiyi rəsmi səfər çox əhəmiyyətlidir. Həmin səfər zamanı müxtəlif sahələr üzrə 14 saziş və Anlaşma Memorandumu imzalanıb. Bu sənədlərin ən önəmlisi BƏƏ ilə Azərbaycan Respublikası arasında Hərtərəfli Strateji Tərəfdaşlıq üzrə əməkdaşlıq haqqında Sazişdir. Bu sənəd BƏƏ-Azərbaycan əlaqələrində mühüm mərhələ sayılır və bilik əsasında qurulan çevik iqtisadiyyat yaratmaq istiqamətində ortaq arzuları əks etdirir. Saziş çərçivəsində ilk iclas noyabrın 27-də Əbu-Dabidə keçirilib.

Səfir həmçinin bildirib ki, Prezident İlham Əliyevin iyul ayında Əbu-Dabiyə rəsmi səfəri iki dost ölkə arasında yeni əməkdaşlıq sahələrini açıb. Bu səfərlər böyük investorlara investisiyaların mübadiləsi üçün imkanlar yaratdı. Ümumilikdə təxminən 68 saziş və anlaşma memorandumunun imzalanması enerji, dayanıqlılıq və süni intellekt kimi fərqli vacib sahələri əhatə edir. İki ölkə arasındakı iqtisadi əlaqələrin güclənməsi nəticəsində 2024-cü ildə ümumi ticarət həcmi yüksək səviyyəyə çatıb. Bu rəqəm təxminən 2 milyard 200 milyon ABŞ dolları təşkil edir. BƏƏ-Azərbaycan münasibətləri qarşılıqlı hörmətə və ümumi maraqların əldə edilməsinə əsaslanan möhkəm dostluq əlaqələrini göstərir.

İkitərəfli əlaqələrin dərinləşməsi nəqliyyat sahəsində də özünü göstərir. Səfirin verdiyi məlumata görə, iki ölkə arasında hava nəqliyyatı da xeyli artıb. BƏƏ-nin milli aviadaşıyıcıları üçün həftəlik birbaşa uçuşların ümumi sayı təxminən 28 reysə çatıb. Azərbaycan aviaşirkətləri üçün isə bu rəqəm həftədə 14 reysdir. Bu rəqəmlər həm turizm, həm də işgüzar əlaqələr baxımından əhəmiyyətlidir. Diplomat vurğulayıb ki, bütün bu inkişaflar BƏƏ ilə Azərbaycan Respublikası arasında əlaqələrin daha parlaq gələcəyini göstərir.