BDYPİ-dən həftəsonu səfərləri öncəsi vacib xəbərdarlıq

Həftəsonları paytaxt və digər şəhər, rayon sakinlərinin bölgələrə səfərləri xeyli artır. Bu artım avtomobil yollarında nəqliyyat axınının intensivliyini yüksəldir.

Gözlənilən nəqliyyat sıxlığını nəzərə alaraq, Daxili İşlər Nazirliyinin Baş Dövlət Yol Polisi İdarəsi (BDYPİ) respublika ərazisində təhlükəsizliyi qorumaq üçün nəzarət-profilaktik tədbirləri gücləndirib. Patrul xidmətinin fəaliyyəti daha da intensivləşdirilib.

Lakin BDYPİ-nin müşahidələri göstərir ki, təkmilləşdirilmiş nəzarətə baxmayaraq, bəzi sürücülər hələ də yol hərəkəti qaydalarına riayət etmir. Tələskənlik, diqqətsizlik və məsuliyyətsiz davranışlar ağır nəticəli yol-nəqliyyat hadisələrinin baş verməsinə səbəb olur. İdarə bu səbəbdən səfərə çıxmağa hazırlaşan bütün sürücülərə xüsusi müraciət edib.

BDYPİ mənzil başına təhlükəsiz çatmaq üçün bir sıra vacib tövsiyələr verir. Sürücülər öncədən nəqliyyat vasitələrinin texniki sazlığını yoxlamalı, nasaz avtomobillərlə yola çıxmamalıdırlar. Sürət həddinə, həmçinin ötmə və manevretmə zamanı təhlükəsizlik qaydalarına ciddi əməl etmək lazımdır. Hərəkət zamanı yol və hava şəraitini mütləq nəzərə almaq gərəkdir.

Uzun məsafəli səfərlərdə fasilələrlə hərəkət etmək çox lazımdır. Sürücülər yorğun və ya yuxusuz halda sükan arxasına əyləşməməlidirlər. Diqqəti yayındıran hərəkətlərdən çəkinmək də böyük əhəmiyyət daşıyır. BDYPİ xatırladır ki, yol hərəkəti zamanı nizam-intizam və məsuliyyət- təhlükəsizliyin əsas təminatıdır.