BBC-nin baş direktoru Trampın çıxışının saxtalaşdırılması ilə bağlı xəbərlərdən sonra istefa verib

Britaniyanın BBC yayım korporasiyasının baş direktoru Tim Deyvi ABŞ Prezidenti Donald Trampın çıxışının saxtalaşdırılması ilə bağlı yaranan qalmaqalın ardından vəzifəsindən ayrıldı. Korporasiya rəhbərliyinin verdiyi məlumata görə, bu hadisə BBC daxilində ciddi böhrana səbəb oldu.

Qeyd edək ki, Tim Deyvidən əlavə, korporasiyanın xəbər yayımı üzrə rəhbəri Debora Terness də vəzifəsini tərk etdi. Bu istefaların əsas səbəbi Ağ Evin mətbuat katibi Karolayn Levittin BBC-yə qarşı irəli sürdüyü ciddi ittihamlar idi. Levitt bildirib ki, BBC Trampın 2021-ci ilin yanvar ayında Kapitoliyə hücumdan əvvəlki çıxışını bilərəkdən təhrif edib.

Ağ Evin nümayəndəsinin sözlərinə görə, korporasiya ABŞ liderinin çıxışını saxtalaşdırmaqla elə bir təəssürat yaratmağa çalışıb ki, guya Donald Tramp Kapitoliyadakı iğtişaşları dəstəkləyirmiş. Bu cür iddialar BBC-nin obyektivliyinə dair suallar doğurdu. Nəticədə, yayılan bu xəbərlər və ittihamlar fonunda korporasiyanın iki yüksək rütbəli rəhbəri vəzifələrindən getməli oldu.