Baş Prokurorluq: Yasamal rayonundakı yanğınla bağlı istintaq obyektiv və qanun çərçivəsində aparılır

Baş Prokurorluq Bakının Yasamal rayonunda üç nəfərin ölümü ilə nəticələnən çoxmərtəbəli yaşayış binasındakı yanğın hadisəsi ilə bağlı ictimaiyyətə və mediaya müraciət edib. Müraciətdə qeyri-rəsmi mənbələrdən alınan və dəqiqləşdirilməmiş həssas məlumatların yayılmasının cəmiyyətdə çaşqınlığa yol açdığı diqqətə çatdırılıb.

Qeyri-rəsmi informasiyaların paylaşılması həm də istintaqın obyektiv aparılmasına zərər vurur. Baş Prokurorluq zərərçəkmiş şəxslərin hüquqlarını nəzərə alaraq bəyan edir ki, cinayət işi üzrə istintaq tam, obyektiv və qanun çərçivəsində həyata keçirilir. Bütün rəsmi və təsdiqlənmiş məlumatlar yalnız Baş Prokurorluğun Mətbuat xidməti tərəfindən qısa zamanda təqdim ediləcəkdir.

Hadisə Mirəli Seyidov küçəsində yerləşən binada baş vermişdi. Məlumatda bildirilir ki, bu istintaq prosesi ilə bağlı hər hansı informasiya yayımlayarkən media nümayəndələri və sosial şəbəkə istifadəçiləri qanunvericilik tələblərinə riayət etməlidirlər. Onlardan xahiş olunur ki, yalnız rəsmi mənbələrə istinad etsinlər və hüquqi əsası, təsdiqi olmayan informasiyaların yayılmasına yol verməsinlər. Yanğınla bağlı aparılan araşdırmada artıq bir nəfər şübhəli şəxs qismində saxlanılıb.

Saxlanılan şəxs binanın zirzəmi və birinci mərtəbələrində yerləşən qeyri-yaşayış obyektini, yəni "Loft Dent" klinikasını müqavilə əsasında icarəyə götürmüş Paşayev Bəhruz Sahib oğludur. Hadisə zamanı 2018-ci il təvəllüdlü Qənbərli Arzu Əli qızı, 1983-cü il təvəllüdlü Məmmədov Samir Kamal oğlu və 1977-ci il təvəllüdlü Hümbətova Könül Vəlibəy qızı tüstüdən zəhərlənərək həlak olublar. Bundan əlavə, 20-dən çox şəxs zəhərlənmə diaqnozu ilə xəstəxanaya yerləşdirilmişdi. Baş Prokurorluq bu müraciətlə bir daha təsdiqləyir ki, istintaq tam şəffaf və qanunvericiliyin tələblərinə uyğun aparılacaqdır.