Bakıda məqsədimiz müzakirələr və qətnamələr vasitəsilə rəqəmsal dayanıqlığı gücləndirməkdir - Beynəlxalq Elelktrik Rabitəsi İttifaqının baş katibi

Beynəlxalq Elektrik Rabitəsi İttifaqının (BERİ) baş katibi Dorin Boqdan-Martin Bakıda keçirilən Ümumdünya Telekommunikasiya İnkişaf Konfransında (“WTDC-25”) təşkilatın əsas hədəflərini açıqlayıb. O bildirib ki, onların Bakıdakı əsas məqsədi siyasi müzakirələr və qətnamələr vasitəsilə rəqəmsal dayanıqlığı gücləndirməkdir.

Baş katib rabitənin günümüzdə insanlığın fərdi və kollektiv dayanıqlığının təməl daşı olduğunu, həmçinin gələcəkdə də bu rolunu qoruyacağını xüsusi vurğulayıb. Boqdan-Martin internet şəbəkəsinə çıxışın cəmiyyətin hər təbəqəsi üçün nə qədər həyati əhəmiyyət daşıdığını izah etdi. Məsələn, internetə çıxış bir uşaq üçün təhsil almaq imkanı deməkdir. Bu, eyni zamanda yeni bizneslərin mobil texnologiyaları istifadə edərək ən vacib xidmətləri göstərmək şansı yaradır.

O qeyd edib ki, gələcək analar üçün həyati vacib tibbi məlumatlara çıxış əldə etmək, gənclər üçün isə layiqli qazanc əldə etmək üçün tələb olunan bacarıqlara yiyələnmək imkanı yaranır. Boqdan-Martin bu ehtiyacların ödənilməsinə kömək etməyi və siyasi müzakirələr vasitəsilə dayanıqlılığı artırmağı Bakı konfransının birbaşa vəzifəsi adlandırdı. O əlavə etdi ki, "WTDC-25"in ümumi məqsədi rəqəmsal imkanları hər kəs üçün əlçatan və mənalı etməkdir.

Konfrans, sürətlə dəyişən texnoloji dünyada heç kimin geridə qalmaması üçün şərait yaratmağı hədəfləyir. Tədbir qlobal rəqəmsal inkişaf gündəminə yeni nəfəs verməyi və rəqəmsal dünyanın faydalarını bütün dünyaya yaymağı qarşısına məqsəd qoyub.