Bakıda çoxmərtəbəli yaşayış binasında tüstüdən zəhərlənənlərin son durumu açıqlanıb

Noyabrın 21-də Yasamal rayonu, M.Seyidov küçəsi ərazisində baş verən yanğın hadisəsi nəticəsində çox sayda insan tüstüdən zəhərlənmişdi. Hadisədən dərhal sonra Kliniki Tibbi Mərkəzin Təcili Tibbi Yardım şöbəsinə ümumilikdə 27 nəfər yerləşdirildi. Həkimlər bütün zərərçəkənlərə ən qısa zamanda zəruri tibbi xidmətlər göstərdilər. İlkin müdaxilələrdən sonra 20 nəfərin (13 kişi, 7 qadın) vəziyyəti qənaətbəxş hesab edildi. Onlar artıq ambulator müalicə almaq üçün evə buraxılıblar.

Hazırda 7 nəfərin (5 qadın, 2 kişi) müalicəsi Klinik Tibbi Mərkəzin Toksikologiya şöbəsində davam edir. Həkimlər onların vəziyyətini yaxından izləyir. Bu şəxslərdən altısının vəziyyəti orta ağır olaraq qiymətləndirilir. Təəssüf ki, zəhərlənən bir nəfər azyaşlının vəziyyəti ağır olaraq qalır, o, hələ də ciddi tibbi nəzarətə ehtiyac duyur.

Bu faciəli hadisə zamanı təəssüf ki, itkilər də yaşanıb. Məlumdur ki, yanğın nəticəsində üç nəfər həlak olub, 20-dən çox şəxs isə tüstüdən zəhərlənərək xəstəxanaya çatdırılıb. Hadisənin ciddiliyini nəzərə alan hüquq-mühafizə orqanları faktla bağlı dərhal araşdırmalara başlayıblar. Baş vermiş yanğınla əlaqədar rəsmi cinayət işi başlanılıb.